38 minutes ago
2
ARTICLE AD BOX
ନୂଆଦିଲ୍ଲୀ: ଭାରତୀୟ ରେଳବାଇ ଏବେ ପାର୍ସଲ ପଠାଇବା ପ୍ରକ୍ରିୟାକୁ ସହଜ କରିବାକୁ ଯୋଜନା କରୁଛି। ଏହି ନୂଆ ବ୍ୟବସ୍ଥା ଲାଗୁ ହେଲେ ଲୋକଙ୍କୁ ସାମଗ୍ରୀ ପଠାଇବା ପାଇଁ ଆଉ ରେଳ ଷ୍ଟେସନ୍କୁ ବାରମ୍ବାର ଯିବାକୁ ପଡ଼ିବ ନାହିଁ। ଘରୁ ପାର୍ସଲ ସଂଗ୍ରହ କରି ନିର୍ଦ୍ଧାରିତ ଠିକଣାରେ ପହଞ୍ଚାଇବାର ସୁବିଧା ଆରମ୍ଭ କରିବାକୁ ଯୋଜନା ରହିଛି। ଏହାଦ୍ୱାରା ସାଧାରଣ ଗ୍ରାହକଙ୍କ ସହ ଛୋଟ ବ୍ୟବସାୟୀ ଏବଂ ଅନଲାଇନ୍ ବିକ୍ରେତାମାନେ ମଧ୍ୟ ଲାଭବାନ ହୋଇପାରିବେ।
ପ୍ରାଥମିକ ପର୍ଯ୍ୟାୟରେ ଦେଶର ୮ଟି ପ୍ରମୁଖ ସହରରେ ଏହି ଯୋଜନା ଲାଗୁ କରିବାକୁ ପ୍ରସ୍ତୁତି ଚାଲିଛି। ଏହି ସହରଗୁଡ଼ିକ ହେଉଛି ଦିଲ୍ଲୀ, ମୁମ୍ବାଇ, କୋଲକାତା, ଚେନ୍ନାଇ, ଅହମ୍ମଦାବାଦ, ହାଇଦ୍ରାବାଦ, ବେଙ୍ଗାଲୁରୁ ଏବଂ ପୁଣେ। ଯୋଜନା ସଫଳ ହେବା ସହ ଆବଶ୍ୟକ ପ୍ରସ୍ତୁତି ଶେଷ ହେବା ପରେ ଏହାକୁ ଅନ୍ୟ ସହରକୁ ମଧ୍ୟ ସମ୍ପ୍ରସାରଣ କରାଯାଇପାରେ।
ଏହି ପଦକ୍ଷେପ ଦ୍ୱାରା ଛୋଟ ବ୍ୟବସାୟୀ ଓ ଅନଲାଇନ୍ ବ୍ୟବସାୟ କରୁଥିବା ଲୋକେ ନିଜ ସାମଗ୍ରୀକୁ ଗ୍ରାହକଙ୍କ ପାଖରେ ପହଞ୍ଚାଇବାରେ ସୁବିଧା ପାଇବେ। ଗ୍ରାହକମାନେ ମୋବାଇଲ୍ ଆପ୍ ମାଧ୍ୟମରେ ପାର୍ସଲ ବୁକିଂ କରିବା ସହ ଅନଲାଇନ୍ରେ ଟଙ୍କା ମଧ୍ୟ ପୈଠ କରିପାରିବେ।
ଘରେ ବସି କରିପାରିବେ ପାର୍ସଲ ବୁକିଂ
ଏହି ବ୍ୟବସ୍ଥାରେ ଗ୍ରାହକମାନେ ମୋବାଇଲ୍ ଆପ୍ ସାହାଯ୍ୟରେ ପାର୍ସଲ ବୁକ୍ କରିପାରିବେ। ବୁକିଂ ହେବା ପରେ ଗ୍ରାହକଙ୍କ ଘରୁ ସାମଗ୍ରୀ ସଂଗ୍ରହ କରାଯାଇ ରେଳ ଷ୍ଟେସନ୍କୁ ନିଆଯିବ। ଏହାପରେ ରେଳବାଇ ମାଧ୍ୟମରେ ପାର୍ସଲକୁ ଗନ୍ତବ୍ୟ ସହରକୁ ପଠାଯିବ। ସେଠାରୁ ସମ୍ପୃକ୍ତ ପରିବହନ ଓ ଲଜିଷ୍ଟିକ୍ସ କମ୍ପାନି ସାମଗ୍ରୀକୁ ଗ୍ରାହକଙ୍କ ଶେଷ ଠିକଣାରେ ପହଞ୍ଚାଇବ।ପାର୍ସଲ ପଠାଇବା ପ୍ରକ୍ରିୟାକୁ ଅଧିକ ସୁବିଧାଜନକ କରିବା ଏହି ଯୋଜନାର ମୁଖ୍ୟ ଉଦ୍ଦେଶ୍ୟ। ବିଶେଷକରି ଯେଉଁମାନଙ୍କୁ ସାମଗ୍ରୀ ପଠାଇବା ପାଇଁ ନିଜେ ରେଳ ଷ୍ଟେସନ୍କୁ ଯିବାକୁ ପଡ଼ୁଛି, ସେମାନଙ୍କୁ ଏହାଦ୍ୱାରା ଆଶ୍ୱସ୍ତି ମିଳିପାରିବ। ଯଦି କୌଣସି ଗ୍ରାହକ ପାର୍ସଲ ପଠାଇବା ନିଷ୍ପତ୍ତି ବଦଳାଇ ବୁକିଂ ବାତିଲ୍ କରିବାକୁ ଚାହାନ୍ତି, ତେବେ ତାଙ୍କୁ ଅଧିକାଂଶ ଟଙ୍କା ଫେରସ୍ତ ମିଳିପାରିବ। ତେବେ ଏଥିପାଇଁ ୧୦ ଟଙ୍କା ଶୁଳ୍କ କଟାଯିବ।
ଅନ୍ୟପକ୍ଷରେ, ଘରୁ ସାମଗ୍ରୀ ସଂଗ୍ରହ କରିବା ଏବଂ ଗନ୍ତବ୍ୟ ସ୍ଥାନରେ ପହଞ୍ଚାଇବା ପାଇଁ ଦିଆଯାଇଥିବା ଶୁଳ୍କ ଫେରସ୍ତ ହେବ କି ନାହିଁ, ତାହା ସମ୍ପୃକ୍ତ ଲଜିଷ୍ଟିକ୍ସ କମ୍ପାନିର ନିୟମ ଅନୁଯାୟୀ ନିର୍ଦ୍ଧାରଣ କରାଯିବ।
ରେଳବାଇ ଓ ଲଜିଷ୍ଟିକ୍ସ କମ୍ପାନି ମିଶି କରିବେ କାମ
ଏହି ସମ୍ପୂର୍ଣ୍ଣ ବ୍ୟବସ୍ଥାରେ ରେଳବାଇ ସହିତ ଲଜିଷ୍ଟିକ୍ସ କମ୍ପାନିଗୁଡ଼ିକର ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକା ରହିବ। ରେଳବାଇ ଗୋଟିଏ ସହରରୁ ଅନ୍ୟ ସହରକୁ ପାର୍ସଲ ପହଞ୍ଚାଇବ। ଅନ୍ୟପଟେ, ଲଜିଷ୍ଟିକ୍ସ କମ୍ପାନିଗୁଡ଼ିକ ଘରୁ ସାମଗ୍ରୀ ସଂଗ୍ରହ କରିବା ଏବଂ ଶେଷ ଠିକଣାରେ ଡେଲିଭରି କରିବା ଦାୟିତ୍ୱ ନେବେ। ଏହି ସୁବିଧା ସଫଳତାର ସହ ଲାଗୁ ହେଲେ ପୂର୍ବ ଅପେକ୍ଷା ପାର୍ସଲ ପଠାଇବା ଅଧିକ ସହଜ ହୋଇପାରିବ। ଏହାଦ୍ୱାରା ଗ୍ରାହକଙ୍କ ସମୟ ବଞ୍ଚିବା ସହ ଛୋଟ ବ୍ୟବସାୟୀମାନେ ଦୂରଦୂରାନ୍ତରେ ଥିବା ଗ୍ରାହକଙ୍କ ପାଖକୁ ନିଜ ଉତ୍ପାଦ ପଠାଇବା ପାଇଁ ଆଉ ଏକ ବିକଳ୍ପ ପାଇବେ।
ଟ୍ରେନ୍ ଛାଡ଼ିବାର ୧୫ ଦିନ ପୂର୍ବରୁ ଆରମ୍ଭ ହେବ ବୁକିଂ
ଏହି ବ୍ୟବସ୍ଥାରେ ଟ୍ରେନ୍ର ନିର୍ଦ୍ଧାରିତ ଯାତ୍ରା ଆରମ୍ଭ ତାରିଖର ୧୫ ଦିନ ପୂର୍ବରୁ ପାର୍ସଲ ବୁକିଂ କରିହେବ। ଅର୍ଥାତ୍, ଗ୍ରାହକମାନଙ୍କୁ ଶେଷ ମୁହୂର୍ତ୍ତ ପର୍ଯ୍ୟନ୍ତ ଅପେକ୍ଷା କରିବାକୁ ପଡ଼ିବନି। ସେମାନେ ଆଗୁଆ ନିଜ ସାମଗ୍ରୀ ପଠାଇବାର ଯୋଜନା କରିପାରିବେ।
ରେଳବାଇର ନିୟମ ଅନୁଯାୟୀ, ମୋଟରସାଇକେଲ୍, କାର୍, ଆସବାବପତ୍ର, ଘରୋଇ ଉପକରଣ ଏବଂ ବ୍ୟବସାୟ ସମ୍ବନ୍ଧୀୟ ସାମଗ୍ରୀକୁ ମଧ୍ୟ ପାର୍ସଲ ଭାବେ ପଠାଯାଇପାରିବ। ତେବେ ସାମଗ୍ରୀ ବୁକିଂ କରିବା ପୂର୍ବରୁ ସମ୍ପୃକ୍ତ ନିୟମ ଓ ସର୍ତ୍ତାବଳୀ ବିଷୟରେ ଜାଣିବା ଜରୁରୀ।
ଶେଖ ହସିନାଙ୍କ ପଳାୟନ ଭିଡିଓ ସୁଟିଂ କରିଥିବା ବାୟୁସେନା ଅଧିକାରୀଙ୍କ ରହସ୍ୟମୟ ମୃତ୍ୟୁ
