42 minutes ago
1
ARTICLE AD BOX
ନୂଆଦିଲ୍ଲୀ: ଦିଲ୍ଲୀର ବିଭିନ୍ନ ବଜାରରେ କଟକଣା ସତ୍ତ୍ୱେ ଖୋଲାଖୋଲି ବାଣ ବିକ୍ରି ହେଉଥିବା ଖବରକୁ ନେଇ ସୁପ୍ରିମ୍କୋର୍ଟ ମଙ୍ଗଳବାର ଉଦ୍ବେଗ ପ୍ରକାଶ କରିଛନ୍ତି। ଲାଇସେନ୍ସ ଥିବା ଓ ନ ଥିବା ବାଣ ସହିତ କ୍ୟୁଆର୍ କୋଡ୍ ଥିବା ଓ ନ ଥିବା ବାଣ ମଧ୍ୟ ବଜାରରେ ମିଳୁଥିବା ଖବର ଉପରେ ଅଦାଲତ ଧ୍ୟାନ ଦେଇଛନ୍ତି। ଏହାକୁ ରୋକିବା ସହ ଅଦାଲତଙ୍କ ନିର୍ଦ୍ଦେଶର କଡ଼ାକଡ଼ି ପାଳନ ସୁନିଶ୍ଚିତ କରିବାକୁ କେନ୍ଦ୍ର ସରକାରଙ୍କୁ କୁହାଯାଇଛି।
ବିଚାରପତି ଏମ୍.ଏମ୍. ସୁନ୍ଦରେଶ ଓ ପ୍ରସନ୍ନ ବି. ବରାଲେଙ୍କ ଖଣ୍ଡପୀଠ ଏକ ଖବରକାଗଜରେ ପ୍ରକାଶିତ ରିପୋର୍ଟକୁ ଉଲ୍ଲେଖ କରି ଅତିରିକ୍ତ ସଲିସିଟର ଜେନେରାଲ ଐଶ୍ୱର୍ଯ୍ୟା ଭାଟିଙ୍କୁ ଏ ଦିଗରେ ଆବଶ୍ୟକ ପଦକ୍ଷେପ ନେବାକୁ କହିଥିଲେ। ଅଦାଲତ କହିଥିଲେ, ନିର୍ଦ୍ଦେଶ ଜାରି ହେବା ସତ୍ତ୍ୱେ ଦୋକାନରେ ସବୁ ପ୍ରକାର ବାଣ ମିଳୁଥିବା ଖବର ଚିନ୍ତାଜନକ। ଏହା ଅଦାଲତଙ୍କ ନିର୍ଦ୍ଦେଶର କାର୍ଯ୍ୟକାରିତା ନେଇ ପ୍ରଶ୍ନ ଉଠାଉଛି। ସୁପ୍ରିମ୍କୋର୍ଟ ନିକଟରେ ଦିଲ୍ଲୀ-ଏନ୍ସିଆର୍ରେ ସୀମିତ ସମୟ ପାଇଁ ପ୍ରମାଣିତ ସବୁଜ ବାଣ ବିକ୍ରି ଓ ଫୁଟାଇବାକୁ ଅନୁମତି ଦେଇଛନ୍ତି। ନଭେମ୍ବର ୭ ଓ ୮ ତାରିଖରେ ସକାଳ ୬ଟାରୁ ୭ଟା ଏବଂ ରାତି ୮ଟାରୁ ୧୦ଟା ପର୍ଯ୍ୟନ୍ତ ବାଣ ଫୁଟାଇହେବ। ନଭେମ୍ବର ୯ରୁ ପୁଣି ସମ୍ପୂର୍ଣ୍ଣ କଟକଣା ଲାଗୁ ହେବ।
PMLA : ପିଏମ୍ଏଲ୍ଏ ମାମଲାର ଶୁଣାଣି ପାଇଁ ନୂଆ ଖଣ୍ଡପୀଠ ଗଠନ କଲେ ସୁପ୍ରିମକୋର୍ଟ
ବିକ୍ରି ପାଇଁ କେବଳ ଅନୁମୋଦିତ ସବୁଜ ବାଣକୁ ଅନୁମତି ମିଳିଛି। ଏଥିପାଇଁ ନିର୍ଦ୍ଦିଷ୍ଟ ବିକ୍ରୟସ୍ଥଳ ଚିହ୍ନଟ କରାଯିବ। ପ୍ରତ୍ୟେକ ବାଣ ପ୍ୟାକେଟ୍ରେ ଉତ୍ପାଦକ, ପ୍ରମାଣପତ୍ର ଓ ଲାଇସେନ୍ସ ସମ୍ପର୍କିତ ତଥ୍ୟ ଯାଞ୍ଚ କରିବା ପାଇଁ ସ୍ୱତନ୍ତ୍ର କ୍ୟୁଆର୍ କୋଡ୍ ରହିବା ଆବଶ୍ୟକ। ଅନ୍ଲାଇନ୍ରେ ବାଣ ବିକ୍ରି ନିଷିଦ୍ଧ କରାଯାଇଛି। ବେରିୟମ୍ ଭଳି ନିଷିଦ୍ଧ ପଦାର୍ଥ ଥିବା ବାଣ ଉତ୍ପାଦନ ଓ ବିକ୍ରି ଉପରେ ମଧ୍ୟ କଟକଣା ରହିଛି। ଏଥିସହ ହସ୍ପିଟାଲ, ନର୍ସିଂହୋମ୍, ପ୍ରାଥମିକ ଓ ଜିଲ୍ଲା ସ୍ୱାସ୍ଥ୍ୟକେନ୍ଦ୍ର, ବୃଦ୍ଧାଶ୍ରମ ଏବଂ ନିର୍ଦ୍ଦିଷ୍ଟ ନିରବ ଅଞ୍ଚଳର ୩୦୦ ମିଟର ପରିଧି ମଧ୍ୟରେ ବାଣ ଫୁଟାଇବାକୁ ଅଦାଲତ ନିଷେଧ କରିଛନ୍ତି। ଏହି ସ୍ଥାନଗୁଡ଼ିକୁ ‘ବାଣ ନିଷିଦ୍ଧ ଅଞ୍ଚଳ’ ଭାବେ ଚିହ୍ନଟ କରିବା ସହ ଲୋକଙ୍କୁ ଅବଗତ କରାଇବାକୁ ନିର୍ଦ୍ଦେଶ ରହିଛି।
