5 days ago
3
ARTICLE AD BOX
ମହାରାଷ୍ଟ୍ର: ମହାରାଷ୍ଟ୍ରର ଛତ୍ରପତି ସମ୍ଭାଜୀନଗର ଜିଲ୍ଲାର ଖାବଡା ପାହାଡ଼ରେ ଏକ ଅତ୍ୟନ୍ତ ଦୁଃଖଦ ଘଟଣା ଘଟିଛି। ପାହାଡ଼ କୂଳରେ ଠିଆ ହୋଇଥିବା ୧୮ ବର୍ଷୀୟ ପୁଅକୁ ବଞ୍ଚାଇବାକୁ ଯାଇ ତାଙ୍କ ବାପାଙ୍କ ମୃତ୍ୟୁ ହୋଇଥିବା ବେଳେ, କିଛି ସମୟ ପରେ ମା’ ମଧ୍ୟ ପାହାଡ଼ରୁ ଖସିପଡ଼ିଥିଲେ। ଘଟଣାରେ ପରିବାରର ତିନିଜଣ ସଦସ୍ୟଙ୍କ ମୃତ୍ୟୁ ଘଟିଛି।
ଆହୁରି ପଢ଼ନ୍ତୁ: ବନ୍ୟା ପରିସ୍ଥିତିର ମୁକାବିଲା ନିମନ୍ତେ ସମ୍ପୂର୍ଣ୍ଣ ପ୍ରତିବଦ୍ଧ ରାଜ୍ୟ ସରକାର
ସୂଚନା ଅନୁସାରେ, ଦେବଲାଇ ଅଞ୍ଚଳର ଏହି ୧୮ ବର୍ଷୀୟ ଯୁବକ ଶୁକ୍ରବାର ସକାଳ ପ୍ରାୟ ୧୦ଟା ସମୟରେ ଖାବଡା ପାହାଡ଼ର ଏକ କୂଳକୁ ଯାଇଥିଲେ। ସେଠାରେ ସେ ନିଜ ଜୀବନ ହାରିବାକୁ ଧମକ ଦେଇଥିଲେ। ଏହା ଜାଣିବା ପରେ ପରିବାର ଲୋକ, ଗ୍ରାମବାସୀ ଏବଂ ପୋଲିସ ତାଙ୍କୁ ସୁରକ୍ଷିତ ସ୍ଥାନକୁ ଫେରି ଆସିବା ପାଇଁ ବୁଝାଇବା ଆରମ୍ଭ କରିଥିଲେ।
ତିନି ଘଣ୍ଟା ଧରି ଚାଲିଥିଲା ବୁଝାସୁଝା
ପ୍ରାୟ ତିନି ଘଣ୍ଟା ଧରି ଗ୍ରାମବାସୀ ଓ ତାଙ୍କ ମା’ ଯୁବକଙ୍କୁ ବୁଝାଇବାକୁ ଚେଷ୍ଟା କରିଥିଲେ। ତାଙ୍କୁ ନିଜ ଭବିଷ୍ୟତ ଏବଂ ବାପା-ମା’ଙ୍କ ବିଷୟରେ ଭାବିବାକୁ ଅନୁରୋଧ କରାଯାଇଥିଲା। ତଥାପି ଯୁବକ ନିଜ ନିଷ୍ପତ୍ତିରେ ଅଟଳ ରହିଥିଲେ। ଯୁବକ ଜଣକ ବାରମ୍ବାର ନିଜ ଜୀବନ ହାରିବାକୁ ଧମକ ଦେଉଥିବା ବେଳେ, ଘଟଣାସ୍ଥଳରେ ଥିବା ପର୍ଯ୍ୟଟକ ଓ ସ୍ଥାନୀୟ ଲୋକମାନେ ଏହି ଘଟଣାର ଭିଡିଓ ମଧ୍ୟ କରିଥିଲେ।
ପୁଅକୁ ଧରିବାକୁ ଯାଇ ଖସିପଡ଼ିଲେ ବାପା
ପ୍ରଥମେ ଯୁବକଙ୍କ ବାପା ତଳେ ଠିଆ ହୋଇ ତାଙ୍କୁ ଫେରି ଆସିବାକୁ ଆକୁଳ ନିବେଦନ କରୁଥିଲେ। ପରେ ଘଟଣାର ଶେଷ ୧୫-୨୦ ମିନିଟ୍ ସମୟରେ ସେ ପାହାଡ଼ ଉପରକୁ ଚଢ଼ିଥିଲେ। ଯୁବକ ଜଣକ ପାହାଡ଼ କୂଳ ଆଡ଼କୁ ବଢ଼ିବାରୁ ବାପା ତାଙ୍କୁ ସେଠାରୁ ଦୂରେଇ ଆସିବାକୁ ବୁଝାଇଥିଲେ। ଅପରାହ୍ନ ପ୍ରାୟ ୧ଟା ସମୟରେ ପୁଅକୁ ଧରିବାକୁ ଚେଷ୍ଟା କରିବା ବେଳେ ଉଭୟେ ଭାରସାମ୍ୟ ହରାଇ ପାହାଡ଼ରୁ ତଳକୁ ଖସିପଡ଼ିଥିଲେ। କିଛି ସମୟ ପରେ ଭୟଭୀତ ମା’ ମଧ୍ୟ ପାହାଡ଼ରୁ ଖସିପଡ଼ିଥିଲେ। ଫଳରେ ପରିବାରର ତିନିଜଣଙ୍କ ମୃତ୍ୟୁ ଘଟିଥିଲା। ଘଟଣାସ୍ଥଳରେ ପୋଲିସ ଅଧିକାରୀମାନେ ମଧ୍ୟ ଉପସ୍ଥିତ ଥିଲେ। ସେମାନେ ଯୁବକଙ୍କୁ ପାହାଡ଼ କୂଳରୁ ଓହରି ଆସିବାକୁ ବାରମ୍ବାର ବୁଝାଇଥିଲେ। କିନ୍ତୁ ସମସ୍ତଙ୍କ ଚେଷ୍ଟା ସତ୍ତ୍ୱେ ତାଙ୍କୁ ସୁରକ୍ଷିତ ଭାବେ ଫେରାଇ ଆଣିବା ସମ୍ଭବ ହୋଇନଥିଲା।
ପ୍ରତ୍ୟକ୍ଷଦର୍ଶୀଙ୍କ ବୟାନ
ପ୍ରତ୍ୟକ୍ଷଦର୍ଶୀ ସଞ୍ଜୟ ଯାଦବଙ୍କ କହିବା ଅନୁସାରେ, ଯୁବକଙ୍କୁ ବୁଝାଇବା ପାଇଁ ତାଙ୍କ ବାପା-ମା’ ଓ ଅନ୍ୟମାନେ ବହୁତ ଚେଷ୍ଟା କରିଥିଲେ। କିନ୍ତୁ ଯୁବକ କାହାର କଥା ଶୁଣିନଥିଲେ ଏବଂ ପାହାଡ଼ କୂଳରେ ଠିଆ ହୋଇ ରହିଥିଲେ। ଯାଦବ କହିଛନ୍ତି, ମା’ ନିଜ ପୁଅକୁ ପାହାଡ଼ରୁ ଡେଇଁ ନପଡ଼ିବା ପାଇଁ ଆକୁଳ ହୋଇ ଗୁହାରି କରୁଥିଲେ। ପୋଲିସ ଅଧିକାରୀମାନେ ମଧ୍ୟ ଘଟଣାସ୍ଥଳରେ ରହି ଯୁବକଙ୍କୁ ବୁଝାଇବାକୁ ଚେଷ୍ଟା କରୁଥିଲେ। ଘଟଣାଟି ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳାଇ ଦେଇଛି।
ଆହୁରି ପଢ଼ନ୍ତୁ: ସେଲଫି ନେବା ପଡ଼ିଲା ମହଙ୍ଗା: ଅଥଳ ଜଳ ରାଶିରେ ୨ ଛାତ୍ର ନିଖୋଜ, ଅଳ୍ପକେ ବଞ୍ଚିଲେ ଜଣେ ଛାତ୍ର
ଅଧିକ ଦେଖନ୍ତୁ:
