1 week ago
5
ARTICLE AD BOX
ଅଲୱର:ଦଶହରାକୁ ଆକର୍ଷଣୀୟ କରିବା ପାଇଁ ଏବେ ରାବଣ ଦହନରେ ଯୋଡ଼ି ହେଉଛି ଆଧୁନିକ ଜ୍ଞାନକୌଶଳ। ରାଜସ୍ଥାନର ଅଲୱରରେ ଏଥର ୬୫ ଫୁଟ୍ ଉଚ୍ଚର ରାବଣ, ୬୦ ଫୁଟ୍ ର କୁମ୍ଭକର୍ଣ୍ଣ ଏବଂ ୫୫ ଫୁଟ୍ ର ମେଘନାଦ ପ୍ରତିମା ଦହନ କରାଯିବ। ଏହି ବିଶାଳ ପ୍ରତିମାଗୁଡ଼ିକୁ ତିଆରି କରୁଛନ୍ତି ଉତ୍ତରପ୍ରଦେଶର ଆଗ୍ରାରୁ ଆସିଥିବା ମୁସଲମାନ କାରିଗର। ଏଥର ରାବଣର ବେକ, ହାତ, ଗୋଡ଼ ଓ ଖଣ୍ଡା ଘୂରିବା ସହ ଆଖି ଓ ପାଟିରୁ ନିଆଁ ବାହାରିବା ଭଳି ବ୍ୟବସ୍ଥା ରହିବ।
କାରିଗରଙ୍କ କହିବା ଅନୁଯାୟୀ, ପୂର୍ବରୁ ପାରମ୍ପରିକ ପଦ୍ଧତିରେ ରାବଣ ପ୍ରତିମା ତିଆରି କରାଯାଉଥିଲା। କିନ୍ତୁ ସମୟ ସହ ଏଥିରେ ଆଧୁନିକ ଜ୍ଞାନକୌଶଳ, ମୋଟର ଓ ଆଲୋକ ବ୍ୟବସ୍ଥାର ବ୍ୟବହାର ବଢ଼ିଛି। ଏହାଦ୍ୱାରା ପ୍ରତିମାଗୁଡ଼ିକ ଅଧିକ ଆକର୍ଷଣୀୟ ହେବା ସହ ଦର୍ଶକଙ୍କୁ ଭିନ୍ନ ଅନୁଭୂତି ଦେବ। ଏଭଳି ହାଇଟେକ୍ ପ୍ରତିମାର ଚାହିଦା ମଧ୍ୟ ବଢ଼ୁଛି।
୧୫୦ରୁ ଅଧିକ କାରିଗର ନିୟୋଜିତ
ଏହି ପ୍ରତିମା ତିଆରି ପାଇଁ ବରେଲିରୁ ବାଉଁଶ ଅଣାଯାଏ। ବାଉଁଶରେ ଢାଞ୍ଚା ପ୍ରସ୍ତୁତ କରି ତା’ ଉପରେ ଚମକଦାର କାଗଜ ଲଗାଯାଏ। ରାବଣ ପ୍ରତିମା ନିର୍ମାଣ ଅନେକ କାରିଗର ପରିବାରର ବଂଶାନୁକ୍ରମିକ ପେସା। ସେମାନଙ୍କ ପୂର୍ବପୁରୁଷମାନେ ମଧ୍ୟ ଏହି କାମ ସହ ଜଡ଼ିତ ଥିଲେ। କାରିଗରମାନେ ରାବଣଙ୍କୁ ଜଣେ ବିଦ୍ୱାନ ପଣ୍ଡିତ ଭାବେ ମାନିବା ସହ ପ୍ରତିମା ନିର୍ମାଣ ସମୟରେ ତାଙ୍କୁ ସମ୍ମାନ ଦେଇଥାନ୍ତି। ସେମାନଙ୍କ ସୂଚନା ଅନୁସାରେ, ରାଜସ୍ଥାନର ପାଲିରେ ବର୍ଷସାରା ରାବଣ ପ୍ରତିମା ତିଆରି କରାଯାଏ। ଏଠାରେ ୧୦୦ ଫୁଟ୍ ଉଚ୍ଚର ପ୍ରତିମା ମଧ୍ୟ ନିର୍ମାଣ ହୋଇଥାଏ। ଦଶହରାର ପ୍ରାୟ ଚାରି ମାସ ପୂର୍ବରୁ ପ୍ରସ୍ତୁତି ଆରମ୍ଭ ହୁଏ ଏବଂ ଏହି କାମରେ ୧୫୦ରୁ ଅଧିକ କାରିଗର ନିୟୋଜିତ ଅଛନ୍ତି, ଯେଉଁମାନେ ସମସ୍ତେ ମୁସଲିମ ସମ୍ପ୍ରଦାୟର। ରାଜସ୍ଥାନ, ଗୁଜରାଟ ଓ ମଧ୍ୟପ୍ରଦେଶ ସମେତ ଦେଶର ବିଭିନ୍ନ ରାଜ୍ୟରେ ଏହି କାରିଗରମାନେ ପ୍ରତିମା ନିର୍ମାଣ କରିଥାନ୍ତି।
Arrested: ଟାଇଗରଙ୍କୁ ଗୁଳି କରିଥିବା ୧୭, ୧୮ ଏବଂ ୨୨ ବର୍ଷୀୟ ୩ ଜେନ୍-ଜେଡ୍ ସୁଟର ଚିହ୍ନଟ
ଏହି କାରିଗରମାନଙ୍କ ପାଇଁ ରାବଣ ପ୍ରତିମା ତିଆରି କେବଳ ଜୀବିକା ନୁହେଁ, ବରଂ ପିଢ଼ି ପରେ ପିଢ଼ି ଚାଲିଆସୁଥିବା ପରମ୍ପରା। ଦଶହରା ସମୟରେ ମିଳୁଥିବା ରୋଜଗାରରେ ସେମାନଙ୍କ ପରିବାରର ବର୍ଷସାରା ଖର୍ଚ୍ଚ ଚଳେ। ଅନ୍ୟପଟେ, ଅଲୱରରେ ରାବଣ ଦହନ କାର୍ଯ୍ୟକ୍ରମରେ ଗ୍ରୀନ୍ କ୍ରାକର୍ସ ବ୍ୟବହାର କରାଯିବ। ଏହି ଉତ୍ସବ ପରମ୍ପରା ସହ ଆଧୁନିକତା ଏବଂ ହିନ୍ଦୁ-ମୁସଲମାନ ଭାଇଚାରାର ଏକ ସୁନ୍ଦର ଉଦାହରଣ ପାଲଟିଛି।
