2 weeks ago
3
ARTICLE AD BOX
ଲକ୍ଷ୍ନୌ: ଉତ୍ତରପ୍ରଦେଶର ମୁଖ୍ୟମନ୍ତ୍ରୀଯୋଗୀ ଆଦିତ୍ୟନାଥ କଂଗ୍ରେସ ଉପରେ ତୀବ୍ର ଆକ୍ରମଣ କରି କହିଛନ୍ତି ଯେ, ଗତ କିଛି ଦିନ ଧରି ଦେଶର ରାଜଧାନୀ ଦିଲ୍ଲୀରେ ଲଗାତାର ଦେଖିବାକୁ ମିଳୁଛି ଯେ କଂଗ୍ରେସ ଓ ଇଣ୍ଡିଆ ମେଣ୍ଟ କେବଳ ସାଧାରଣ ଲୋକଙ୍କୁ ହଇରାଣ କରୁନାହାନ୍ତି, ବରଂ ଅବ୍ୟବସ୍ଥା ଓ ଅରାଜକତା ସୃଷ୍ଟି କରି ଦେଶର ସାମ୍ବିଧାନିକ ସଂସ୍ଥାଗୁଡ଼ିକୁ ମଧ୍ୟ କାଠଗଡ଼ାରେ ଠିଆ କରାଇବାକୁ ହୀନ ଉଦ୍ୟମ କରୁଛନ୍ତି। ପରିଚୟର ସଙ୍କଟ ସୃଷ୍ଟି କରିବା ଏବଂ ଦୁର୍ନୀତିପୂର୍ଣ୍ଣ ଉଦ୍ଦେଶ୍ୟ ଯୋଗୁଁ କଂଗ୍ରେସ ଓ ଏହାର ସହଯୋଗୀ ଦଳଗୁଡ଼ିକ ସେମାନଙ୍କ ବିଶ୍ୱସନୀୟତା ସମ୍ପୂର୍ଣ୍ଣ ହରାଇଛନ୍ତି। ସେମାନଙ୍କର ଏହି ଅରାଜନୈତିକ ଆଚରଣକୁ ଦେଶର ଜନସାଧାରଣ ଭଲ ଭାବରେ ଦେଖୁଛନ୍ତି।
ନିର୍ବାଚନ ଜିତିଲେ ନିଜର ପୁରୁଷାର୍ଥ, ହାରିଲେ ଇଭିଏମ୍ ଦୋଷୀ
ଇଲେକ୍ଟ୍ରୋନିକ୍ ଗଣମାଧ୍ୟମର ପ୍ରତିନିଧିମାନଙ୍କ ସହ ଆଲୋଚନା ବେଳେ ମୁଖ୍ୟମନ୍ତ୍ରୀ ଯୋଗୀ କହିଛନ୍ତି, ଆଶ୍ଚର୍ଯ୍ୟର କଥା ହେଉଛି, ନିର୍ବାଚନ ଜିତିଲେ ଏମାନେ ନିଜର ପୁରୁଷାର୍ଥକୁ ଶ୍ରେୟ ଦିଅନ୍ତି, କିନ୍ତୁ ହାରିଗଲେ ଇଭିଏମ୍ ଓ ନିର୍ବାଚନ ଆୟୋଗକୁ ଦୋଷ ଦିଅନ୍ତି। ନ୍ୟାୟାଳୟ ଯଦି ମାମଲାର ଗୁଣବତ୍ତା ଓ ଯୋଗ୍ୟତା ଆଧାରରେ କୌଣସି ରାୟ ଦିଅନ୍ତି, ତେବେ ମାନ୍ୟବର ନ୍ୟାୟାଳୟଙ୍କୁ ମଧ୍ୟ କାଠଗଡ଼ାରେ ଠିଆ କରାଇବାକୁ ହୀନ ଉଦ୍ୟମ କରାଯାଏ। ଏପରିକି ବିଭିନ୍ନ ପ୍ରକାରର ଧମକ ଦେବାକୁ ମଧ୍ୟ ଚେଷ୍ଟା କରାଯାଏ। ଅନ୍ୟାନ୍ୟ ସାମ୍ବିଧାନିକ ସଂସ୍ଥାଗୁଡ଼ିକୁ କାଠଗଡ଼ାରେ ଠିଆ କରାଇବା, ଗାଳିଗୁଲଜ କରିବା ଏବଂ ଅବ୍ୟବସ୍ଥା ସୃଷ୍ଟି କରିବା କଂଗ୍ରେସର ନିୟତିର ଅଂଶ ପାଲଟିଛି।
କଂଗ୍ରେସ ନିଜ ନେତୃତ୍ୱ ପରିବର୍ତ୍ତନ କରୁ
ମୁଖ୍ୟମନ୍ତ୍ରୀ କହିଛନ୍ତି ଯେ, କଂଗ୍ରେସ ନେତୃତ୍ୱ ବୁଝିବା ଉଚିତ ଯେ ଜନସାଧାରଣ କାହିଁକି ପ୍ରତିଥର ସେମାନଙ୍କୁ ପ୍ରତ୍ୟାଖ୍ୟାନ କରୁଛନ୍ତି। ୧୯୮୫ ପରଠାରୁ ଉତ୍ତରପ୍ରଦେଶରେ କଂଗ୍ରେସ ଆଉ କ୍ଷମତାକୁ ଫେରିପାରିନାହିଁ। ଉତ୍ତରପ୍ରଦେଶର ଜନସାଧାରଣ ୪୧ ବର୍ଷ ପୂର୍ବରୁ ହିଁ କଂଗ୍ରେସକୁ ବିଦାୟ ଦେଇଥିଲେ। ଦେଶର ଅନ୍ୟ ରାଜ୍ୟଗୁଡ଼ିକରେ ମଧ୍ୟ ଲୋକଙ୍କର କଂଗ୍ରେସ ପ୍ରତି ମୋହଭଙ୍ଗ ହୋଇଛି ଏବଂ ସେମାନେ ଏହାଠାରୁ ମୁକ୍ତି ପାଇଛନ୍ତି।
କଂଗ୍ରେସ ନେତାମାନେ ନିଜର ଅକର୍ମଣ୍ୟ, ଦୁର୍ନୀତିଗ୍ରସ୍ତ ଏବଂ ଜନସାଧାରଣଙ୍କ ବିଶ୍ୱାସ ହରାଇଥିବା ନେତୃତ୍ୱକୁ ପରିବର୍ତ୍ତନ କରିବା ଉଚିତ। ଭାରତରେ ଅରାଜକତା ସୃଷ୍ଟି ନକରିବା ସହ ଦେଶର ସାମ୍ବିଧାନିକ ସଂସ୍ଥାଗୁଡ଼ିକୁ କାଠଗଡ଼ାରେ ଠିଆ କରାଇବା ପାଇଁ ହୀନ ଉଦ୍ୟମରୁ ବିରତ ରହିବା ଆବଶ୍ୟକ ବୋଲି ଯୋଗୀ କହିଛନ୍ତି।
