1 month ago
11
ARTICLE AD BOX
ଭୁବନେଶ୍ୱର: ବର୍ଷା ଋତୁ ଆସିଲେ ଅଧିକାଂଶ ଲୋକ ସର୍ଦି, ଭାଇରାଲ ଜ୍ବର କିମ୍ବା ଡେଙ୍ଗୁ ଭଳି ରୋଗରୁ ବଞ୍ଚିବା ଉପରେ ଧ୍ୟାନ ଦେଇଥାନ୍ତି, କିନ୍ତୁ ଏହି ସମୟରେ ଆଉ ଗୋଟିଏ ସାଧାରଣ ସମସ୍ୟା ହୋଉଛି ଗୋଇଠି ଫାଟିବା। ଅନେକେ ଏହାକୁ କେବଳ ଶୀତ ଋତୁର ସମସ୍ୟା ବୋଲି ଭାବୁଥିବା ସତ୍ତେ, ମୌସୁମୀରେ ପାଦ ବାରମ୍ବାର ଓଦା ହେବା, ମଇଳା ପାଣି ସହ ସମ୍ପର୍କ ଏବଂ ଯଥାଯଥ ଯତ୍ନର ଅଭାବରୁ ଗୋଇଠିର ଚର୍ମ କ୍ଷତିଗ୍ରସ୍ତ ହୋଇ ଫାଟିବା ଆରମ୍ଭ କରେ। ଏହି ସମସ୍ୟାକୁ ଅବହେଳା କଲେ ଏହି ଛୋଟ ଫାଟ ମଧ୍ୟ ପରେ ସଂକ୍ରମଣର କାରଣ ହୋଇଥାଏ । ଯାହା ବହୁତ କ୍ଷତିକାରକ ହୋଇଥାଏ।
ବର୍ଷାରେ ତ୍ୱଚାର ସୁରକ୍ଷା ସ୍ତର ଦୁର୍ବଳ
ଚର୍ମରୋଗ ବିଶେଷଜ୍ଞମାନଙ୍କ କହିବା ଅନୁସାରେ, ବର୍ଷା ଋତୁରେ ତ୍ୱଚାର ବାହ୍ୟ ସୁରକ୍ଷା ସ୍ତର ଦୁର୍ବଳ ହୋଇଯାଏ, କାରଣ ପାଦ ବାରମ୍ବାର ଓଦା ହୋଇ ପୁଣି ଶୁଖିଯାଏ। ଏହାର ଫଳରେ ତ୍ୱଚା ଆର୍ଦ୍ରତା ଧରିରଖିପାରେ ନାହିଁ ଏବଂ ଗୋଇଠିର ମୋଟା ଚର୍ମ କଠିନ ହୋଇ ଫାଟିଯାଏ। ଦୀର୍ଘ ସମୟ ଓଦା ଜୋତା ପିନ୍ଧିବା, କାଦୁଅ ଓ ମଇଳା ପାଣିରେ ଚାଲିବା, ପାଦକୁ ଭଲଭାବେ ଧୋଇ ଶୁଖିଲା ନକରିବା, ଏବଂ ଫଙ୍ଗାଲ୍ ସଂକ୍ରମଣ ଏହି ସମସ୍ୟାର ପ୍ରମୁଖ କାରଣ। ବିଶେଷକରି ମଧୁମେହ ରୋଗୀ ଓ ଶୁଷ୍କ ତ୍ୱଚା ଥିବା ବ୍ୟକ୍ତିମାନେ ଏହି ଅସୁବିଧାରେ ଅଧିକ ପ୍ରଭାବିତ ହୁଅନ୍ତି।
Bahudajatra: ନଭିମୁମ୍ବାଇର ଖାରଘରଠାରେ ବାହୁଡ଼ା ଯାତ୍ରା
ଗୋଇଠି ଫାଟିବାରୁ ବଞ୍ଚିବା ପାଇଁ ଦୈନନ୍ଦିନ ଯତ୍ନ ଅତ୍ୟନ୍ତ ଜରୁରୀ। ପାଦକୁ ସବୁବେଳେ ସଫା ଓ ଶୁଖିଲା ରଖିବା, ବାହାରୁ ଆସିଲେ ଧୋଇ ଭଲଭାବେ ଶୁଖାଇବା, ଏବଂ ନିୟମିତ ଭାବେ ଫୁଟ୍ କ୍ରିମ୍ କିମ୍ବା ମଏଷ୍ଚରାଇଜର ବ୍ୟବହାର କରିବା ଦରକାର। ଯୁରିଆ, ଗ୍ଲିସେରିନ୍ କିମ୍ବା ଲାକ୍ଟିକ୍ ଏସିଡ୍ ଥିବା କ୍ରିମ୍ ଗୋଇଠିର ଚର୍ମକୁ କୋମଳ ରଖିବାରେ ସାହାଯ୍ୟ କରେ। ସେହିପରି, ସପ୍ତାହକୁ କେତେକ ଥର ହାଲୁକା ଭାବରେ ପ୍ୟୁମିସ୍ ପଥର ବ୍ୟବହାର କରି ମୃତ ଚର୍ମକୁ ସଫା କରାଯାଇପାରେ। ଏହା ସହିତ ସଫା ମୋଜା ଓ ସୁବିଧାଜନକ, ଶୁଖିଲା ରହୁଥିବା ଜୋତା ପିନ୍ଧିବା ମଧ୍ୟ ଅତ୍ୟାବଶ୍ୟକ।
ଅନ୍ୟପଟେ, କେତେକ ଭୁଲ୍ ଅଭ୍ୟାସ ଗୋଇଠିର ସମସ୍ୟାକୁ ଅଧିକ ବଢ଼ାଇଦିଏ, ଯଥା—ଦିନସାରା ଓଦା ଜୋତା ପିନ୍ଧିବା, ମଇଳା ମୋଜା ପୁଣି ପିନ୍ଧିବା, ଫାଟିଥିବା ଚର୍ମକୁ ଟାଣିବା କିମ୍ବା ବ୍ଲେଡ୍ରେ କାଟିବା, ଏବଂ ମଏଷ୍ଚରାଇଜର ବ୍ୟବହାର ନକରିବା। ଏହା ସହିତ ଲେମ୍ବୁ, ବେକିଂ ସୋଡା କିମ୍ବା ଟୁଥପେଷ୍ଟ ପରି ଜିନିଷ ଲଗାଇବା ତ୍ୱଚାକୁ ଅଧିକ କ୍ଷତିଗ୍ରସ୍ତ କରିପାରେ। ଯଦି ଗୋଇଠିରେ ଗଭୀର ଫାଟ, ବେଦନା, ରକ୍ତସ୍ରାବ କିମ୍ବା ସଂକ୍ରମଣ ଲକ୍ଷଣ ଦେଖାଯାଏ, ତେବେ ଡେରି ନକରି ଡାକ୍ତରଙ୍କୁ ଦେଖା କରିବା ଉଚିତ। ସରଳ ଯତ୍ନ ଓ ସତର୍କତା ଅନୁସରଣ କଲେ ବର୍ଷା ଋତୁରେ ମଧ୍ୟ ଗୋଇଠି ଫାଟିବା ସମସ୍ୟାକୁ ସହଜରେ ରୋକାଯାଇପାରିବ।
