Gandhi’ Handwritten: ମହାତ୍ମା ଗାନ୍ଧୀଙ୍କ ଦୈନନ୍ଦିନ ଚିନ୍ତାଧାରା ସଂଗ୍ରହ ରେକର୍ଡ ୧୬.୨୦ କୋଟି ଟଙ୍କାରେ ନିଲାମ

ନୂଆଦିଲ୍ଲୀ: ମହାତ୍ମା ଗାନ୍ଧୀ ତାଙ୍କର ଘନିଷ୍ଠ ସହାୟକ ଓ ବନ୍ଧୁ ଆନନ୍ଦ ଟି ହିଙ୍ଗୋରାନିଙ୍କ ଉଦ୍ଦେଶ୍ୟରେ ଲେଖିଥିବା ଦୈନନ୍ଦିନ ଚିନ୍ତାଧାରା ସଂଗ୍ରହ ଭାରତରେ ରେକର୍ଡ଼ ୧୬.୨୦ କୋଟି ଟଙ୍କାରେ ନିଲାମ ହୋଇଛି। ହିଙ୍ଗୋରାନିଙ୍କ ପତ୍ନୀ ବିଦ୍ୟାଙ୍କ ମୃତ୍ୟୁ ପରେ ତାଙ୍କୁ ଆଧ୍ୟାତ୍ମିକ ମାର୍ଗଦର୍ଶନ ଓ ସାନ୍ତ୍ୱନା ପ୍ରଦାନ କରିବା ପାଇଁ ଗାନ୍ଧୀଙ୍କ ଦ୍ବାରା ଏହି ଦୈନିକ ଚିନ୍ତନ ଲେଖାଯାଇଥିଲା। ପରେ ହାତଲେଖାଗୁଡ଼ିକୁ ‘ଏ ଥଟ୍ ଫର୍ ଦି ଡେ’ ପୁସ୍ତକ ଭାବରେ ସଂକଳିତ ଓ ପ୍ରକାଶ କରାଯାଇଥିଲା, ଯାହା ଗାନ୍ଧୀଙ୍କ ବ୍ୟକ୍ତିଗତ ଦର୍ଶନ ଓ ତାଙ୍କ ନିକଟତମ ଲୋକଙ୍କ ସହିତ ତାଙ୍କ ସମ୍ପର୍କର ଏକ ଗୁରୁତ୍ୱପୂର୍ଣ୍ଣ ରେକର୍ଡ କରିଥିଲା। ସାଫ୍ରୋନଆର୍ଟ ଦ୍ୱାରା ଆୟୋଜିତ ଏକ ନିଲାମରେ ମହାତ୍ମା ଗାନ୍ଧୀଙ୍କ ୬୮୮ଟି ହାତଲେଖାର ବିରଳ ସଂଗ୍ରହ ସମ୍ପ୍ରତି ରେକର୍ଡ ୧୬.୨୦ କୋଟି ଟଙ୍କାରେ ବିକ୍ରି ହୋଇଛି। ହିଙ୍ଗୋରାନି ପରିବାର ଦ୍ୱାରା ଦଶନ୍ଧି ଦଶନ୍ଧି ଧରି ସଂରକ୍ଷିତ ଏହି ବିଶାଳ ସଂଗ୍ରହ ଗାନ୍ଧୀଙ୍କ ଜୀବନର ୨୦ ବର୍ଷରୁ ଅଧିକ ସମୟ ଅନ୍ତର୍ଭୁକ୍ତ। ଏଥିରେ ଭାରତର ସ୍ୱାଧୀନତା ଆନ୍ଦୋଳନର ଗୁରୁତ୍ୱପୂର୍ଣ୍ଣ ସମୟ ସହିତ ଜଡିତ ବ୍ୟକ୍ତିଗତ ଚିଠିପତ୍ର ଓ ଅନ୍ୟାନ୍ୟ ଦଲିଲ ଅନ୍ତର୍ଭୁକ୍ତ। ଏହା କୌଣସି ଭାରତୀୟ ଐତିହାସିକ ଦଲିଲର ନିଲାମରେ ଏପର୍ଯ୍ୟନ୍ତ ମିଳିଥିବା ସର୍ବାଧିକ ମୂଲ୍ୟ।

ଟ୍ରାଇଡେଣ୍ଟରେ ଏଆଇ ସେମିନାର