1 hour ago
2
ARTICLE AD BOX
କାଠମାଣ୍ଡୁ: ନେପାଳରେ ପ୍ରଳୟଙ୍କରୀ ବନ୍ୟା ୩୦୦ରୁ ଅଧିକ ଲୋକଙ୍କ ଜୀବନ ନେଇଯାଇଛି। ଆହୁରି ଅନେକ ଲୋକ ପ୍ରଳୟରେ ନିଶ୍ଚିହ୍ନ ହୋଇଯାଇଛନ୍ତି। ହଠାତ୍ ଏଭଳି ଏକ ପ୍ରଳୟଙ୍କରୀ ବନ୍ୟା ଯେଉଁ ବିପର୍ଯ୍ୟୟ ଘଟାଇଛି ତାହା ଦେଖି ସାଧାରଣରେ ଭୟ ବଢ଼ିଛି। ଇତି ମଧ୍ୟରେ ନେପାଳ ବିଦେଶ ମନ୍ତ୍ରୀ ମନ୍ତ୍ରୀ ଭାରତ ପାଇଁ ସାଧାରଣ ବିପଦ ଥିବା ନେଇ ମଧ୍ୟ ଚେତାବନୀ ଦେଇଛନ୍ତି।
ନେପାଳ ବିଦେଶ ମନ୍ତ୍ରୀ ଶିଶିର ଖନାଲ କହିଛନ୍ତି, ଭାରତ , ଚୀନ୍, ନେପାଳ ଓ ଭୂଟାନ ପରିବେଶଗତ ଭାବେ ପରସ୍ପର ସହ ଜଡ଼ିତ। ତେଣୁ ଏମାନଙ୍କୁ ନିଜନିଜ ମତଭେଦକୁ ଦୂରେଇ ଏକାଠି ହୋଇ କାମ କରିବାକୁ ପଡ଼ିବ। ହିମାଳୟର ପରିବେଶଗତ ଦୁର୍ବଳତା ଯୋଗୁ ନେପାଳ ଓ ଭାରତ ଉଭୟ ସମାନ ବିପଦର ସମ୍ମୁଖୀନ ହେଉଥିବା ଶିଶିର କହିଛନ୍ତି। କାଠମାଣ୍ଡୁରେ ଏକ କର୍ଯ୍ୟକ୍ରମରେ ଖନାଲ କହିଥିଲେ ଯେ ଭାରତ-ନେପାଳ ସମ୍ପର୍କକୁ କେବଳ ସାଂସ୍କୃତିକ ଓ ଧାର୍ମିକ ସମ୍ପର୍କ ଆଧାରରେ ନୁହେଁ, ବରଂ ପରିବେଶଗତ ଦୃଷ୍ଟିକୋଣରୁ ମଧ୍ୟ ଏହାକୁ ଏକ ନୂଆ ରୂପ ଦେବାକୁ ପଡ଼ିବ।
ସେ କହିଛନ୍ତି, ନେପାଳ ଓ ଭାରତ ସର୍ବଦା ଆମ ସମ୍ପର୍କକୁ ‘ରୋଟି-ବେଟି’ ଓ ‘ସୀତା-ରାମ’ ଭଳି ସମ୍ପର୍କ ମାଧ୍ୟମରେ ବର୍ଣ୍ଣନା କରିଆସିଛନ୍ତି। ଧର୍ମ ଓ ସଭ୍ୟତାଗତ ସମ୍ପର୍କ ଆମ ଦୁଇ ଦେଶର ସମ୍ପର୍କରେ ସର୍ବଦା ବଡ଼ ଭୂମିକା ନେଇଛି। କିନ୍ତୁ ଏବେ ଆମ ସମ୍ପର୍କକୁ ପରିବେଶଗତ ଦୃଷ୍ଟିକୋଣରୁ ଗଢ଼ିବାକୁ ପଡ଼ିବ। ଏକ ଗୁରୁତ୍ବପୂର୍ଣ୍ଣ ଟିପ୍ପଣୀ ଦେଇ ମନ୍ତ୍ରୀ କହିଛନ୍ତି, ହିମାଳୟରେ ଯାହା କିଛି ତରଳିଯାଏ, ତାହା ସମୁଦ୍ରରେ ପହଞ୍ଚେ।
Nepal flood: ନେପାଳ ଜଳପ୍ରଳୟ; ଗଣ୍ଡକ ନଦୀରେ ୧.୪୨ ଲକ୍ଷ କ୍ୟୁସେକ୍ ଜଳ
ବନ୍ୟା ବିପର୍ଯ୍ୟୟକୁ ଉଦାହରଣ ଦେଇ ସେ କହିଥିଲେ ଯେ ସେଠାରୁ ପାଣି ଦ୍ରୁତ ଗତିରେ ତଳକୁ ଆସି ନେପାଳର ବିଭିନ୍ନ ଅଞ୍ଚଳରେ ବ୍ୟାପକ କ୍ଷୟକ୍ଷତି କରିଛି। ହିମାଳୟ ଆମ ସମସ୍ତଙ୍କ ପାଇଁ ସାଧାରଣ ଦାୟିତ୍ୱ। ପରିବେଶଗତ ସହଯୋଗ ପାଇଁ ଆହ୍ୱାନ କରି ଖନାଲ କହିଥିଲେ ଯେ ଏଥର ବନ୍ୟା ପାଣି ଭାରତ ଦିଗକୁ ଆହୁରି ତଳକୁ ଯାଇନଥିଲା। କିନ୍ତୁ ଅତୀତରେ ଏପରି ଘଟଣା ଘଟିଛି ଏବଂ ଭବିଷ୍ୟତରେ ମଧ୍ୟ ଘଟିପାରେ। ସେ କହିଛନ୍ତି, ଭାଗ୍ୟବଶତଃ ଏଥର ବନ୍ୟା ପାଣି ଆହୁରି ତଳକୁ ଯାଇ ନେପାଳ ସୀମାବର୍ତ୍ତୀ ଭାରତୀୟ ଅଞ୍ଚଳକୁ ପ୍ରଭାବିତ କରିନାହିଁ। କିନ୍ତୁ ଅତୀତରେ ଏପରି ଘଟିଛି।
ଏହି ପରିପ୍ରେକ୍ଷୀରେ ମନ୍ତ୍ରୀ କହିଛନ୍ତି ଯେ ଭାରତ, ଚୀନ୍, ନେପାଳ ଓ ଭୁଟାନ ପରିବେଶଗତ ଭାବେ ପରସ୍ପର ସହ ଜଡ଼ିତ। ତେଣୁ ରାଜନୈତିକ ମତଭେଦକୁ ପଛରେ ପକାଇ ସମସ୍ତଙ୍କୁ ମିଳିତ ଭାବେ ଏକାଠି କାମ କରିବାକୁ ହେବ। ଖନାଲ କହିଛନ୍ତି, ଚୀନ୍, ନେପାଳ, ଭାରତ ଓ ଭୂଟାନ ପରିବେଶଗତ ଭାବେ ପରସ୍ପର ସହ ଜଡ଼ିତ। ଆମର ସାମୂହିକ ଅସ୍ତିତ୍ୱ ଓ ଭବିଷ୍ୟତ ହିମାଳୟର ପରିବେଶକୁ ସୁରକ୍ଷିତ ରଖିବା ଉପରେ ନିର୍ଭର କରେ। ସେ କହିଛନ୍ତି, ରାଜନୈତିକ ପ୍ରତିଦ୍ୱନ୍ଦ୍ୱିତା ଥାଇପାରେ, କିନ୍ତୁ ଆମକୁ ଏକାଠି ହେବାକୁ ପଡ଼ିବ। କାରଣ ଜଳବାୟୁ ପରିବର୍ତ୍ତନ ପ୍ରତି ହିମାଳୟ ଅଞ୍ଚଳ ସବୁଠାରୁ ଅଧିକ ସମ୍ବେଦନଶୀଳ
ଉଲ୍ଲେଖଯୋଗ୍ୟ ଯେ ବୁଧବାରର ଆକସ୍ମିକ ବନ୍ୟା ନେପାଳ ସୀମାବର୍ତ୍ତୀ ଉତ୍ତରପ୍ରଦେଶ ଓ ବିହାରରେ ମଧ୍ୟ ଚିନ୍ତା ସୃଷ୍ଟି କରିଥିଲା। ଯେକୌଣସି ପରିସ୍ଥିତିର ମୁକାବିଲା ପାଇଁ ଉଭୟ ରାଜ୍ୟ ସରକାର ଜରୁରୀ ବୈଠକ ଡାକି ପ୍ରଶାସନକୁ ସତର୍କ କରିଥିଲେ। ନେପାଳରୁ ବିହାର ଓ ଉତ୍ତରପ୍ରଦେଶ ଦେଇ ଅନେକ ପ୍ରମୁଖ ନଦୀ ପ୍ରବାହିତ ହୋଇଛି। ସେଥିମଧ୍ୟରେ ଗଣ୍ଡକ ନଦୀ (ନାରାୟଣୀ ନାମରେ ମଧ୍ୟ ପରିଚିତ) ଏବଂ କୋସି ନଦୀ ପ୍ରମୁଖ।
ଏହି ନଦୀଗୁଡ଼ିକ ହିମାଳୟ ଓ ତିବ୍ବତ ଅଞ୍ଚଳରୁ ଉତ୍ପତ୍ତି ହୋଇ ଭାରତୀୟ ସମତଳ ଅଞ୍ଚଳକୁ ପ୍ରବେଶ କରିଥାଏ। ସହଯୋଗର ଆବଶ୍ୟକତା ଉପରେ ଜୋର ଦେଇ ଖନାଲ ଚେତାବନୀ ଦେଇଛନ୍ତି ଯେ ହିମାଳୟ ଅଞ୍ଚଳର ପରିବେଶଗତ ଦୁର୍ବଳତା ଭବିଷ୍ୟତରେ ଜଳ ସଙ୍କଟ ସୃଷ୍ଟି କରିପାରେ। ସେ କହିଛନ୍ତି, ପରିସ୍ଥିତି ବଦଳିବା ସହ ଆହୁରି ଅଧିକ ଅସୁରକ୍ଷା ସୃଷ୍ଟି ହେବ ଏବଂ ଏହି ଘଟଣାଗୁଡ଼ିକ ଅଞ୍ଚଳର ପ୍ରାୟ ୨୦୦ କୋଟି ଲୋକଙ୍କ ପାଇଁ ମିଠା ପାଣିର ଉପଲବ୍ଧତାକୁ ପ୍ରଭାବିତ କରିପାରେ।
