1 day ago
5
ARTICLE AD BOX
କାଠମାଣ୍ଡୁ: ତିବ୍ଦତରୁ ହଠାତ୍ ଆସିଥିବା ପ୍ରଳୟଙ୍କରୀ ବନ୍ୟା ପଡ଼ୋଶୀ ନେପାଳରେ ତାଣ୍ଡବ ରଚିଛି। ରସୁୱା ଜିଲ୍ଲାର ତିମୁର ଏବଂ ସ୍ୟାଫ୍ରୁବେସିରେ ହଠାତ୍ ବନ୍ୟା ବ୍ୟାପକ ଆତଙ୍କ ସୃଷ୍ଟି କରିଛି। ପରିସ୍ଥିତିର ଗମ୍ଭୀରତାକୁ ଦୃଷ୍ଟିରେ ରଖି ପାଞ୍ଚଟି ଜିଲ୍ଲାରେ ହାଇ ଆଲର୍ଟ ଜାରି କରାଯାଇଛି। ପ୍ରଧାନମନ୍ତ୍ରୀ ବାଲେନ ଶାହଙ୍କ ନିର୍ଦ୍ଦେଶ ପରେ, ସେନା ଦାୟିତ୍ୱ ଗ୍ରହଣ କରି ପାଣିରେ ଫସି ରହିଥିବା ଜୀବନ ବଞ୍ଚାଇବା ପାଇଁ ହେଲିକପ୍ଟର ବ୍ୟବହାର କରି ଯୁଦ୍ଧକାଳୀନଭିତ୍ତିରେ ଉଦ୍ଧାର କାର୍ଯ୍ୟ ଜାରି ରଖିଛି। ଏପର୍ଯ୍ୟନ୍ତ ୧୬ ଜଣଙ୍କର ମୃତ୍ୟୁ ହୋଇଥିବା ସୂଚନା ମିଳିଛି। ୧୦୦୦ ଲୋକ ଭାସି ଯାଇଥିବା ଆଶଙ୍କା କରାଯାଉଛି। ୩୦୦ ଲୋକ ଏବେ ବି ଫସି ରହିଛନ୍ତି। ୩୦ ପୁଲିସ କର୍ମଚାରୀ ନିଖୋଜ ରହିଥିବା କୁହାଯାଉଛି।
ପୁଲିସ ର୍କମଚାରୀଙ୍କ ସହିତ କୌଣସି ଯୋଗାଯୋଗ ହୋଇପାରୁନାହିଁ। ଚୀନ୍ ସୀମାରେ ଡ୍ୟୁଟିରେ ଥିବା ୯ ଯବାନ ମଧ୍ୟ ନିଖୋଜ ଅଛନ୍ତି। ଏହା ମଧ୍ୟ ଅନୁମାନ କରାଯାଉଛି, ୩୦୦ ଗାଡ଼ି ଭାସି ଯାଇଛି। ନେପାଳ ସେନା ବନ୍ୟା ପ୍ରଭାବିତ ଅଞ୍ଚଳରେ ଉଦ୍ଧାର କାର୍ଯ୍ୟ ଆରମ୍ଭ କରିଛି। ଉଦ୍ଧାର କାର୍ଯ୍ୟ ପାଇଁ ସାତଟି ହେଲିକପ୍ଟର ଏବଂ ୩୫ ଜଣ ଉଦ୍ଧାର କର୍ମଚାରୀଙ୍କୁ ନିୟୋଜିତ କରାଯାଇଛି। ନେପାଳ ସରକାର କହିଛନ୍ତି ଯେ ୩୪୫ ଜଣ ପର୍ଯ୍ୟଟକ ଏବେ ବି ନିଖୋଜ ଅଛନ୍ତି। ନିଖୋଜ ପର୍ଯ୍ୟଟକଙ୍କ ମଧ୍ୟରୁ ୨୯୧ ଜଣ ବିଦେଶୀ। ହଠାତ୍ ପାଣି ପ୍ରବାହିତ ହେବା ଫଳରେ ଉଦ୍ଧାର କାର୍ଯ୍ୟରେ ବାଧା ସୃଷ୍ଟି ହୋଇଛି।
ହଜାରେ ଲୋକଙ୍କୁ ଭସାଇନେଲା
ନେପାଳୀ ଖବରକାଗଜ ଇ-କାନ୍ତିପୁର ଅନୁଯାୟୀ, ବୁଧବାର ସକାଳ ପ୍ରାୟ ୮ଟାରେ ତିବ୍ଦତରେ ୪.୪ ତୀବ୍ରତାର ଭୂମିକମ୍ପ ଅନୁଭୂତ ହୋଇଥିଲା। ଏହାର କିଛି ସମୟ ପରେ, ଲେଣ୍ଡେ ନଦୀ ନିକଟରେ ଏକ ଭୂସ୍ଖଳନ ଘଟି ନଦୀର ପ୍ରବାହ ଅବରୋଧ ହୋଇଯାଇଥିଲା ଏବଂ ରସୁୱା ନଦୀ ନେପାଳ ମୁହାଁ ପ୍ରବାହିତ ହୋଇଥିଲା।
ରିପୋର୍ଟ ଅନୁଯାୟୀ, ବୁଧବାର ସକାଳେ ତିବ୍ଦତରୁ ଆସିଥିବା ଏକ ପ୍ରଳୟଙ୍କରୀ ବନ୍ୟା ଉତ୍ତର ନେପାଳରେ ତାଣ୍ଡବ ସୃଷ୍ଟି କରିଛି, ଏବଂ ତଳମୁଣ୍ଡର ଅନେକ ଜିଲ୍ଲାକୁ ହାଇ ଆଲର୍ଟରେ ରଖାଯାଇଛି। ପୂର୍ବାହ୍ନ ପ୍ରାୟ ୯ଟା ସମୟରେ ଭୋଟେ କୋଶି ନଦୀରେ ଜଳସ୍ତର ବୃଦ୍ଧି ପାଇ ତ୍ରିଶୂଳୀ ନଦୀ ଦେଇ ନୁୱାକୋଟ ଆଡକୁ ମୁହାଁଇଥିଲା। ପ୍ରାରମ୍ଭିକ ସୂଚନା ଅନୁଯାୟୀ ଉତ୍ତର ରସୁୱାରେ, ବିଶେଷକରି ତିମୁର ବଜାର ଅଞ୍ଚଳ, ତିମୁର କଷ୍ଟମ୍ସ କାର୍ଯ୍ୟାଳୟ ଏବଂ ସ୍ୟାବ୍ରୁବେସିରେ ବ୍ୟାପକ କ୍ଷୟକ୍ଷତି ହୋଇଛି। ଜିଲ୍ଲା ଅଧିକାରୀମାନେ ଜୀବନ, ​​ସମ୍ପତ୍ତି ଏବଂ ଭିତ୍ତିଭୂମିର କ୍ଷୟକ୍ଷତି ବିଷୟରେ ବିସ୍ତୃତ ସୂଚନା ସଂଗ୍ରହ କରୁଛନ୍ତି। ଜଳବିଜ୍ଞାନ ବିଶେଷଜ୍ଞମାନଙ୍କ ଅନୁସାରେ ହଠାତ୍ ଜଳପ୍ରବାହ ସ୍ଥାନୀୟ ବର୍ଷା ଯୋଗୁଁ ନୁହେଁ, ବରଂ ତିବ୍ଦତରେ ହିମବାହ ହ୍ରଦ ବନ୍ୟା ଯୋଗୁଁ ହୋଇଛି। ଭୋଟେ କୋଶି ନଦୀ ତିବ୍ଦତରୁ ଉତ୍ପତ୍ତି ହୋଇ ନେପାଳର ତ୍ରିଶୂଳୀ ନଦୀରେ ମିଶିଥାଏ, ଯାହା ପରେ ଗଣ୍ଡକ ନଦୀ ଭାବରେ ଭାରତରେ ପ୍ରବାହିତ ହେଉଛି। ନେପାଳ ସ୍ଥିତି ଦେଖି ଉତ୍ତରପ୍ରଦେଶ ଏବଂ ବିହାରରେ ସତର୍କ ସୂଚନା ଜାରି କରାଯାଇଛି। ବିହାରର ଚମ୍ପାରଣ, ବେତିଆ ଏବଂ ମଧୁବାଣୀ ସମେତ ଛଅଟି ସୀମାନ୍ତ ଜିଲ୍ଲା ପାଇଁ ସତର୍କ ସୂଚନା ଜାରି କରାଯାଇଛି।
ହାଇ ଆଲର୍ଟ ଜାରି
ଜଳବିଜ୍ଞାନ ଏବଂ ପାଣିପାଗ ବିଭାଗ, ସ୍ଥାନୀୟ ପ୍ରଶାସନିକ କାର୍ଯ୍ୟାଳୟ ସହିତ ମିଳିତ ଭାବରେ, ଚୀନ୍ କର୍ତ୍ତୃପକ୍ଷଙ୍କ ସହିତ ଯୋଗାଯୋଗ କରୁଛି ଏବଂ ଘଟଣାର ଉତ୍ସ ନିର୍ଣ୍ଣୟ କରିବା ପାଇଁ ସାଟେଲାଇଟ୍ ତଥ୍ୟ ଯାଞ୍ଚ୍ କରୁଛି। ରାସୁୱା, ନୁୱାକୋଟ, ଧାଡିଂ, ଗୋର୍ଖା ଏବଂ ଚିତୱାନରେ ନଦୀକୂଳ ଅଞ୍ଚଳ ପାଇଁ ଏକ ହାଇ ଆଲର୍ଟ ଜାରି କରାଯାଇଛି। ବୁଧବାର ସନ୍ଧ୍ୟା ସୁଦ୍ଧା ମୁଗଲିଙ୍ଗରେ ମାର୍ଶ୍ୟାଙ୍ଗଡି ନଦୀର ସଂଗମରେ ଜଳସ୍ତର ପହଞ୍ଚିବ ବୋଲି ଆଶା କରାଯାଉଛି। ନେପାଳ ବିପର୍ଯ୍ୟୟ ପରିଚାଳନା ଅଧିକାରୀମାନେ ପ୍ରଭାବିତ ଅଞ୍ଚଳର ବାସିନ୍ଦାଙ୍କୁ ତୁରନ୍ତ ସୁରକ୍ଷା ପଦକ୍ଷେପ ନେବାକୁ ପରାମର୍ଶ ଦେଇଛନ୍ତି।
