51 minutes ago
1
ARTICLE AD BOX
ନ୍ୟୁୟର୍କ: ବିବାଦୀୟ ଖଣିଜ ସମୃଦ୍ଧ ପଶ୍ଚିମ ସାହାରା ଅଞ୍ଚଳକୁ ନେଇ ଦୁଇ ମହାଶକ୍ତି ଆମେରିକା ଏବଂ ରୁଷ ମଧ୍ୟରେ କୂଟନୈତିକ ସ୍ତରରେ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଛି। ଜାତିସଂଘ ସୁରକ୍ଷା ପରିଷଦ (ୟୁଏନଏସସି)ରେ ଏକ ନାଟକୀୟ ଶୈଳୀରେ ହୋଇଥିବା ମତଦାନରେ ସୁରକ୍ଷା ପରିଷଦରେ ଉପସ୍ଥାପିତ ଆମେରିକା ଏବଂ ରୁଷ ଉଭୟଙ୍କର ପ୍ରସ୍ତାବ କାଟ୍ ଖାଇଛି। ପଶ୍ଚିମ ସାହାରା ଉପରେ ମରକ୍କୋର ସାର୍ବଭୌମତ୍ୱ ଦାବିକୁ ସମର୍ଥନ କରି ୩୫ ବର୍ଷ ପୁରୁଣା ଜାତିସଂଘ ଶାନ୍ତିରକ୍ଷା ମିଶନକୁ ସମାପ୍ତ କରିବାକୁ ପ୍ରସ୍ତାବ ଦେଇଥିବା ଆମେରିକା ଦ୍ୱାରା ପ୍ରସ୍ତୁତ ଏକ ପ୍ରସ୍ତାବ ଉପରେ ରୁଷ ନିଜର ଭିଟୋ ବ୍ୟବହାର କରିଥିଲା। ଏହାର କିଛି ସମୟ ପରେ ୧୫ ସଦସ୍ୟ ବିଶିଷ୍ଟ ସୁରକ୍ଷା ପରିଷଦରେ ଆବଶ୍ୟକ ନଅଟି ଭୋଟ ନପାଇ ଶାନ୍ତିରକ୍ଷା ମିଶନକୁ ଗୋଟିଏ ବର୍ଷ ପାଇଁ ବୃଦ୍ଧି କରିବା ପାଇଁ ରୁଷର ପ୍ରସ୍ତାବକୁ ମଧ୍ୟ ପ୍ରତ୍ୟାଖ୍ୟାନ କରାଯାଇଛି।
ଏହି କୂଟନୈତିକ ଅଚଳାବସ୍ଥା ପରେ ଜାତିସଂଘ ଶାନ୍ତି ମିଶନର କାର୍ଯ୍ୟକାଳ ସମାପ୍ତ ହେବାକୁ ବସିଛି। ଫଳରେ ଅଞ୍ଚଳରେ ଅସ୍ଥିରତା ଏବଂ ଯୁଦ୍ଧର ଆଶଙ୍କା ସୃଷ୍ଟି ହୋଇଛି। ଆମେରିକା ଦ୍ୱାରା ଆଗତ ପ୍ରସ୍ତାବରେ ମୋରୋକ୍କୋ ସାର୍ବଭୌମତ୍ୱ ଅଧୀନରେ ପଶ୍ଚିମ ସାହାରା ସ୍ୱାୟତ୍ତତା ପ୍ରଦାନ କରିବା ପାଇଁ ଏକ ଯୋଜନାକୁ ଏକମାତ୍ର ସମ୍ଭବ ସମାଧାନ ଭାବରେ ବର୍ଣ୍ଣନା କରାଯାଇଥିଲା। ଆମେରିକାର ପ୍ରସ୍ତାବରେ ୩୦ ଏପ୍ରିଲ ୨୦୨୭ ସୁଦ୍ଧା ଜାତିସଂଘ ଶାନ୍ତିରକ୍ଷା ମିଶନକୁ ସମ୍ପୂର୍ଣ୍ଣ ଭାଙ୍ଗିଦେବା ଏବଂ ଜନମତ ସଂଗ୍ରହ ପାଇଁ ପ୍ରସ୍ତୁତି ବନ୍ଦ କରିବା ପାଇଁ ଏକ ନୂତନ ରାଜନୈତିକ ମିଶନ ପ୍ରତିଷ୍ଠା କରିବାକୁ ଦାବି କରାଯାଇଥିଲା। ରୁଷ ଏବଂ ଚୀନ୍ ଦୀର୍ଘ ସମୟ ଧରି ପଶ୍ଚିମ ସାହାରାର ଆଦିବାସୀ ସହରାୱି ଲୋକଙ୍କ ପାଇଁ ଏକ ଜନମତ ସଂଗ୍ରହକୁ ସମର୍ଥନ କରିଆସୁଛନ୍ତି, ଯେଉଁଥିରେ ସ୍ୱାଧୀନତାର ବିକଳ୍ପ ମଧ୍ୟ ଅନ୍ତର୍ଭୁକ୍ତ ରହିଛି। ତେବେ ରୁଷ ନିଜର ଭିଟୋ କ୍ଷମତା ବ୍ୟବହାର କରି ଆମେରିକାର ପ୍ରସ୍ତାବକୁ ଖାରଜ କରିଦେଇଥିଲା।
ପ୍ରସ୍ତାବ ପାସ୍ ହେବା ପାଇଁ ନଅଟି ଭୋଟ୍ ଆବଶ୍ୟକ
ଆମେରିକାର ପ୍ରସ୍ତାବକୁ ପ୍ରତ୍ୟାଖ୍ୟାନ କରାଯିବା ପରେ, ସୁରକ୍ଷା ପରିଷଦ ରୁଷ ଦ୍ୱାରା ଉପସ୍ଥାପିତ ଏକ ବିକଳ୍ପ ପ୍ରସ୍ତାବ ଉପରେ ଭୋଟିଂ ହୋଇଥିଲା। ରୁଷର ପ୍ରସ୍ତାବରେ ବର୍ତ୍ତମାନର ଜାତିସଂଘ ଶାନ୍ତିରକ୍ଷା ମିଶନର କାର୍ଯ୍ୟକାଳକୁ ଏକ ବର୍ଷ ପାଇଁ, ୩୧ ଅକ୍ଟୋବର ୨୦୨୭ ପର୍ଯ୍ୟନ୍ତ ବୃଦ୍ଧି କରିବାକୁ ଅନୁରୋଧ କରାଯାଇଥିଲା। ୧୫ ସଦସ୍ୟ ବିଶିଷ୍ଟ ସୁରକ୍ଷା ପରିଷଦରେ ରୁଷ ପ୍ରସ୍ତାବ ସପକ୍ଷରେ କେବଳ ତିନୋଟି ଭୋଟ୍ ଦିଆଯାଇଥିଲା। ଯେତେବେଳେ ୧୧ ସଦସ୍ୟ ରାଷ୍ଟ୍ର ମତଦାନରୁ ବିରତ ରହିଥିଲେ। ସୁରକ୍ଷା ପରିଷଦରେ ଯେକୌଣସି ପ୍ରସ୍ତାବ ପାସ୍ ହେବା ପାଇଁ ସର୍ବନିମ୍ନ ନଅଟି ଭୋଟ୍ ଆବଶ୍ୟକ। ଯେହେତୁ ରୁଷର ପ୍ରସ୍ତାବ ବହୁମତ ହାସଲ କରିବାରେ ବିଫଳ ହୋଇଥିଲା, ତେଣୁ ଆମେରିକାକୁ ନିଜର ଭିଟୋ ପ୍ରୟୋଗ କରିବାର ଆବଶ୍ୟକତା ପଡ଼ି ନଥିଲା। ପ୍ରସ୍ତାବ ସ୍ୱୟଂଚାଳିତ ଭାବରେ କାଟ୍ ଖାଇଥିଲା।
ଉପକୂଳବର୍ତ୍ତୀ ଅଞ୍ଚଳରେ ଯଥେଷ୍ଟ ତୈଳ ଗଚ୍ଛିତ ଅଛି
ପଶ୍ଚିମ ସାହାରା ପୂର୍ବରୁ ଏକ ସ୍ପାନିସ୍ ଉପନିବେଶ ଥିଲା। ଅନୁମାନ କରାଯାଉଛି ଯେ, ସେଠାରେ ପ୍ରଚୁର ଫସଫେଟ୍ ଏବଂ ଉପକୂଳବର୍ତ୍ତୀ ଅଞ୍ଚଳରେ ଯଥେଷ୍ଟ ତୈଳ ଗଚ୍ଛିତ ଅଛି। ୧୯୭୫ ମସିହାରେ ସ୍ପେନ୍ ଯିବା ପରେ ମରକ୍କୋ ପଶ୍ଚିମ ସାହାରାର ନିୟନ୍ତ୍ରଣ ନେଇ ଏହାକୁ ନିଜର ଏକ ଅଂଶ ଘୋଷଣା କରିଥିଲା। ପ୍ରତିବାଦ ସ୍ୱରୂପ ସ୍ଥାନୀୟ ସହରାୱି ଲୋକଙ୍କ ପ୍ରତିନିଧିତ୍ୱ କରୁଥିବା ପୋଲିସାରିଓ ଫ୍ରଣ୍ଟ ଅସ୍ତ୍ରଶସ୍ତ୍ର ଉଠାଇଥିଲା। ୧୯୯୧ ମସିହାରେ, ଜାତିସଂଘ ଦୁଇ ପକ୍ଷ ମଧ୍ୟରେ ଏକ ଅସ୍ତ୍ରବିରତି ମଧ୍ୟସ୍ଥତା କରିଥିଲା ​​ଏବଂ ଏହି ଅଞ୍ଚଳରେ ଏକ ଶାନ୍ତି ମିଶନମୁତୟନ କରିଥିଲା। ଏହାର ପ୍ରାଥମିକ ଉଦ୍ଦେଶ୍ୟ ଥିଲା ଅସ୍ତ୍ରବିରତି ନିରୀକ୍ଷଣ କରିବା ଏବଂ ସହରାୱି ଲୋକମାନେ ସ୍ୱାଧୀନତା ଚାହାଁନ୍ତି କି ମରକ୍କୋର ଅଂଶ ଭାବେ ରହିବାକୁ ଚାହୁଁଛନ୍ତି ତାହା ନିର୍ଣ୍ଣୟ କରିବା ପାଇଁ ଏକ ଜନମତ ସଂଗ୍ରହ କରିବା।
Factory Fire: ଦିଲ୍ଲୀର ଜୋତା କାରଖାନାରେ ଭୟାବହ ଅଗ୍ନିକାଣ୍ଡ: ୪ ଶ୍ରମିକ ଜୀବନ୍ତ ଦଗ୍ଧ, ୨ ଗୁରୁତର
