6 days ago
3
ARTICLE AD BOX
ନୂଆଦିଲ୍ଲୀ: ଦେଶରେ ମୋବାଇଲ୍ ସଂଯୋଗ ବ୍ୟବସ୍ଥାକୁ ଅଧିକ ସୁରକ୍ଷିତ ଓ ଶୃଙ୍ଖଳିତ କରିବା ପାଇଁ ସରକାର ନିୟମ କଡ଼ାକଡ଼ି କରିଛନ୍ତି। ଜଣେ ବ୍ୟକ୍ତିଙ୍କ ନାମରେ ରହିବାକୁ ଥିବା ସର୍ବାଧିକ ମୋବାଇଲ୍ ସଂଯୋଗର ସୀମାକୁ ସରକାର ଏବେ କଠୋର ଭାବେ ଲାଗୁ କରିବାକୁ ନିଷ୍ପତ୍ତି ନେଇଛନ୍ତି। ଆସନ୍ତା ଅଗଷ୍ଟ ୨୪ ତାରିଖରୁ ନିର୍ଦ୍ଧାରିତ ସୀମା ଅତିକ୍ରମ କରିସାରିଥିବା ଗ୍ରାହକମାନଙ୍କୁ ଟେଲିକମ୍ କମ୍ପାନିଗୁଡ଼ିକ ଆଉ ନୂଆ ସିମ୍ କାର୍ଡ ଜାରି କରିପାରିବେ ନାହିଁ। ଏନେଇ ଦୂରସଞ୍ଚାର ବିଭାଗ (ଡିଓଟି) ପକ୍ଷରୁ ସମସ୍ତ ଟେଲିକମ୍ ସେବା ପ୍ରଦାନକାରୀ ସଂସ୍ଥାଗୁଡ଼ିକୁ ସ୍ପଷ୍ଟ ନିର୍ଦ୍ଦେଶନାମା ଜାରି କରାଯାଇଛି।
ଡିଜିଟାଲ୍ ଇଣ୍ଟେଲିଜେନ୍ସ ପ୍ଲାଟଫର୍ମ ଜରିଆରେ ହେବ ଯାଞ୍ଚ
ନୂତନ ନିୟମ ଅନୁଯାୟୀ, ଗ୍ରାହକମାନେ ନୂଆ ସିମ୍ ନେବା ସମୟରେ କଷ୍ଟମର୍ ଆପ୍ଲିକେସନ୍ ଫର୍ମ (ସିଏଏଫ୍)ରେ ପୂର୍ବରୁ ସେମାନଙ୍କ ନାମରେ ଥିବା ସମସ୍ତ ମୋବାଇଲ୍ ନମ୍ବରର ବିବରଣୀ ଦେବା ବାଧ୍ୟତାମୂଳକ ହେବ। ଅନ୍ୟ କମ୍ପାନି କିମ୍ବା ଅନ୍ୟ ଟେଲିକମ୍ ସର୍କଲରୁ ନିଆଯାଇଥିବା ସଂଯୋଗଗୁଡ଼ିକ ମଧ୍ୟ ଏଥିରେ ଅନ୍ତର୍ଭୁକ୍ତ ରହିବ। ଟେଲିକମ୍ କମ୍ପାନୀଗୁଡ଼ିକ ଗ୍ରାହକଙ୍କ ସୂଚନା ଯାଞ୍ଚ କରିବା ପାଇଁ ସରକାରଙ୍କ ''ଡିଜିଟାଲ୍ ଇଣ୍ଟେଲିଜେନ୍ସ ପ୍ଲାଟଫର୍ମ'' (ଡିଆଇପି)ର ସହାୟତା ନେବେ। ଏହି ପ୍ଲାଟଫର୍ମ ଜରିଆରେ ବିଭିନ୍ନ କମ୍ପାନୀର ଗ୍ରାହକ ସୂଚନା ଏକତ୍ରିତ କରାଯାଇଥିବାରୁ ଜଣେ ବ୍ୟକ୍ତିଙ୍କ ନାମରେ କେତୋଟି ସିମ୍ ସକ୍ରିୟ ଅଛି, ତାହା ସହଜରେ ଜଣାପଡ଼ିଯିବ।
ଅଗଷ୍ଟ ୨୩ ତାରିଖରୁ ଡିଆଇପିରେ ଫୋଟୋ-ଆଧାରିତ ପରିଚୟ ବ୍ୟବସ୍ଥା ମଧ୍ୟ ଯୋଡ଼ାଯିବ, ଯାହା ଦ୍ୱାରା ନିର୍ଦ୍ଧାରିତ ସୀମା ଛୁଇଁସାରିଥିବା ଗ୍ରାହକଙ୍କ ପ୍ରତିନିଧି ଚିତ୍ର ଦେଖାଯିବ।ଟେଲିକମ୍ ସଂସ୍ଥାଗୁଡ଼ିକୁ ନିଜର ବ୍ୟବସ୍ଥାକୁ ଡିଜିଟାଲ୍ ଇଣ୍ଟେଲିଜେନ୍ସ ପ୍ଲାଟଫର୍ମ ସହ ସଂଯୋଜିତ କରିବା ପାଇଁ ଆସନ୍ତା ନଭେମ୍ବର ୩୦ ତାରିଖ ପର୍ଯ୍ୟନ୍ତ ସମୟ ଦିଆଯାଇଛି। ଏହି ସମୟ ମଧ୍ୟରେ ଏକ ଅନ୍ତରୀଣ ବ୍ୟବସ୍ଥା ଭାବେ, ଯଦି କୌଣସି ଗ୍ରାହକ ନିର୍ଦ୍ଧାରିତ ସୀମା ଅତିକ୍ରମ କରି ନୂଆ ସିମ୍ ସକ୍ରିୟ କରନ୍ତି, ତେବେ ତାହାକୁ ଗୋଟିଏ ଦିନ ପାଇଁ ତୁରନ୍ତ ନିଲମ୍ବିତ କରାଯିବ। ସମସ୍ୟାର ସମାଧାନ ନ ହେବା ପର୍ଯ୍ୟନ୍ତ ଏହି କଟକଣା ବଳବତ୍ତର ରହିବ।
ପ୍ରତ୍ୟେକ ଲାଇସେନ୍ସପ୍ରାପ୍ତ ସେବା ଅଞ୍ଚଳଗୁଡ଼ିକ ଏହି ବ୍ୟବସ୍ଥାର କାର୍ଯ୍ୟକାରିତା ଏବଂ ସୃଷ୍ଟି ହେଉଥିବା ସମସ୍ୟାର ସମାଧାନ କରିବେ ବୋଲି ଦୂରସଞ୍ଚାର ବିଭାଗ ସ୍ପଷ୍ଟ କରିଛି। ସୂଚନାଯୋଗ୍ୟ ଯେ, ଜଣେ ବ୍ୟକ୍ତି ସର୍ବାଧିକ କେତୋଟି ସିମ୍ ରଖିପାରିବେ ସେ ନେଇ ନିୟମ ପୂର୍ବରୁ ରହିଥିଲା। ଦଶନ୍ଧିରୁ ଅଧିକ ସମୟ ଧରି ସାଧାରଣ ନାଗରିକଙ୍କ ପାଇଁ ସର୍ବାଧିକ ୯ଟି ସିମ୍ ରଖିବାର ନିୟମ ରହିଥିବା ବେଳେ ଜମ୍ମୁ କାଶ୍ମୀର, ଆସାମ ଏବଂ ଉତ୍ତର-ପୂର୍ବ ରାଜ୍ୟଗୁଡ଼ିକର ନାଗରିକଙ୍କ ପାଇଁ ଏହି ସୀମା ୬ଟି ରହିଛି। ମାତ୍ର ବର୍ତ୍ତମାନ ଏହି ନିୟମକୁ କଠୋର ଭାବେ କାର୍ଯ୍ୟକାରୀ କରିବା ପାଇଁ ସରକାର ବ୍ୟବସ୍ଥା ଗ୍ରହଣ କରିଛନ୍ତି।
Ex PM Imran Khan: ଜେଲ୍ରୁ ସିଧା ହସ୍ପିଟାଲ! ଇମ୍ରାନଙ୍କ ସ୍ୱାସ୍ଥ୍ୟକୁ ନେଇ ବଢ଼ିଲା ଚିନ୍ତା
