57 minutes ago
1
ARTICLE AD BOX
ନୂଆଦିଲ୍ଲୀ: ଦିଲ୍ଲୀର ଜଣେ ୨୦ ବର୍ଷୀୟା ଛାତ୍ରୀଙ୍କ ପେଟରୁ ୧.୧୬ କେଜି ଓଜନର ଏକ ବିଶାଳ କେଶଗୁଚ୍ଛ ବାହାର କରାଯିବା ଘଟଣା ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ପିଲାଦିନରୁ ନିଜ କେଶ ଖାଇବାର ଏକ ଅସାଧାରଣ ଅଭ୍ୟାସ କିପରି ଜଣେ ବ୍ୟକ୍ତିଙ୍କ ଜୀବନ ପ୍ରତି ଏକ ବଡ଼ ବିପଦ ସୃଷ୍ଟି କରିପାରେ, ଏହି ଘଟଣାଟି ତାହାର ଏକ ଜ୍ୱଳନ୍ତ ଉଦାହରଣ। ଡାକ୍ତରୀ ଭାଷାରେ ‘ଟ୍ରାଇକୋଫେଜିଆ’ ଓ ‘ଟ୍ରାଇକୋବେଜୋଆର’ ଭଳି ବିରଳ ମାନସିକ ଓ ଶାରୀରିକ ସମସ୍ୟା କାରଣରୁ ଏପରି ଜଟିଳ ପରିସ୍ଥିତି ଉପୁଜିଥାଏ, ଯାହା ଶେଷରେ ଅସ୍ତ୍ରୋପଚାର ଦ୍ୱାରା ହିଁ ନିୟନ୍ତ୍ରଣ କରାଯାଇଥାଏ।
ଆହୁରି ପଢ଼ନ୍ତୁ: ଗ୍ରାମୀଣ ଭାରତରୁ ଜାତିସଂଘ: ନଭେମ୍ବର ୨୭କୁ ବାଲ୍ୟବିବାହ ବିରୋଧୀ ଅନ୍ତର୍ଜାତୀୟ ଦିବସ ଭାବରେ ଘୋଷଣା
ଉକ୍ତ ଛାତ୍ରୀଜଣକ ପ୍ରାୟ ୧୧ ବର୍ଷ ହେବ ନିଜ କେଶ ଖାଇଆସୁଥିଲେ। ଦୀର୍ଘ ସମୟ ଧରି କେଶ ଖାଇବା କାରଣରୁ ତାଙ୍କ ପେଟରେ କ୍ରମଶଃ କେଶ ଜମା ହୋଇ ଏକ ବଡ଼ ଗୁଚ୍ଛ ସୃଷ୍ଟି ହୋଇଯାଇଥିଲା। କିଛି ଦିନ ହେବ ଛାତ୍ରୀଜଣକ ପେଟରେ ପ୍ରବଳ ଯନ୍ତ୍ରଣା ଅଭିଯୋଗ କରୁଥିଲେ। ସେ ବହୁ ସମୟ ଧରି ଠିକ୍ରେ ଖାଦ୍ୟ ଖାଇପାରୁନଥିଲେ। ଏଭଳି ସ୍ଥିତିରେ ତାଙ୍କ ଓଜନ ମଧ୍ୟ କମିବାରେ ଲାଗିଥିଲା ଓ ସେ କ୍ରମାଗତ ଭାବେ ଦୁର୍ବଳତା ଅନୁଭବ କରୁଥିଲେ। ଛାତ୍ରୀଙ୍କ ସ୍ୱାସ୍ଥ୍ୟାବସ୍ଥାକୁ ଦୃଷ୍ଟିରେ ରଖି ଡାକ୍ତରମାନେ ତାଙ୍କର ଯାଞ୍ଚ ଆରମ୍ଭ କରିଥିଲେ। ଯାଞ୍ଚ ସମୟରେ ତାଙ୍କ ପେଟରେ ଏକ କଠିନ ଗଣ୍ଠି ଅନୁଭୂତ ହୋଇଥିଲା। ଏହାପରେ ଡାକ୍ତରମାନେ ଏଣ୍ଡୋସ୍କୋପି କରାଇଥିଲେ, ଯେଉଁଥିରେ ପେଟ ଭିତରେ ପ୍ରଚୁର ପରିମାଣରେ କେଶ ଜମା ହୋଇଥିବା ଜଣାପଡ଼ିଥିଲା। ଡାକ୍ତରମାନେ ପଚାରିବାରୁ ଛାତ୍ରୀଜଣକ ଜଣାଇଥିଲେ ଯେ ସେ ପ୍ରାୟ ୧୧ ବର୍ଷ ହେବ ନିଜ କେଶ ଖାଉଛନ୍ତି। ଏହି ଅଭ୍ୟାସ ତାଙ୍କର ପିଲାଦିନରୁ ଥିଲା। ଧୀରେ ଧୀରେ କେଶଗୁଡ଼ିକ ପେଟରେ ଜମା ହୋଇ ଏକ ଗୁଚ୍ଛ ପାଲଟିଯାଇଥିଲା।
ଆହୁରି ପଢ଼ନ୍ତୁ: ରାଉରକେଲାରେ ଚାଞ୍ଚଲ୍ୟ: ଡ୍ରେନ୍ ଭିତରୁ ଅଜଣା ଯୁବକଙ୍କ ମୃତଦେହ ଉଦ୍ଧାର
ଡାକ୍ତରଙ୍କ କହିବାନୁସାରେ, କେଶ ସାଧାରଣ ଖାଦ୍ୟ ପରି ହଜମ ହୋଇପାରେ ନାହିଁ। ଯଦି କୌଣସି ବ୍ୟକ୍ତି କ୍ରମାଗତ ଭାବେ କେଶ ଗିଳୁଥାଆନ୍ତି, ତେବେ ଏହା ପେଟରେ ଜମା ହୋଇ ରହିଥାଏ। ସମୟ ସ୍ରୋତରେ କେଶଗୁଡ଼ିକ ପରସ୍ପର ସହ ଜଡ଼ିଶୋଇ ଏକ କଠିନ ଏବଂ ବଡ଼ ଗଣ୍ଠିର ରୂପ ନେଇଥାଏ।
ମଣିପାଲ ହସ୍ପିଟାଲର ସର୍ଜରୀ ବିଭାଗର ମୁଖ୍ୟ ଡାକ୍ତର ସନ୍ଦୀପ ଅଗ୍ରୱାଲଙ୍କ କହିବାନୁସାରେ, କେଶଗୁଚ୍ଛଟି ଏତେ ବଡ଼ ଏବଂ କଠିନ ହୋଇସାରିଥିଲା ଯେ ସାଧାରଣ ଏଣ୍ଡୋସ୍କୋପି ଜରିଆରେ ଏହାକୁ ବାହାର କରିବା କଷ୍ଟକର ଥିଲା। ଏହାପରେ ଡାକ୍ତରମାନେ ଅସ୍ତ୍ରୋପଚାର କରିବାକୁ ନିଷ୍ପତ୍ତି ନେଇଥିଲେ। ପେଟରେ ଏକ ଛୋଟ କଣା କରି କେଶର ସମଗ୍ର ଗୁଚ୍ଛକୁ ସତର୍କତାର ସହିତ ବାହାର କରାଯାଇଥିଲା। ଡାକ୍ତରଙ୍କ ମତରେ, ଏହି ଗୁଚ୍ଛଟି ପ୍ରାୟ ୧.୧୬ କେଜି ଓଜନର ଥିଲା ଏବଂ ପେଟର ଏକ ବଡ଼ ଅଂଶରେ ବ୍ୟାପି ରହିଥିଲା।
ଡାକ୍ତରଙ୍କ ସୂଚନାନୁସାରେ, କେଶର ଏହି ଗୁଚ୍ଛଟି ଏତେ ବଡ଼ ହୋଇଯାଇଥିଲା ଯେ ଏହାର ପ୍ରଭାବ ପେଟ ସହିତ ଆଗକୁ ଯାଇ ପାଚନ ପ୍ରକ୍ରିୟା ଉପରେ ମଧ୍ୟ ପଡ଼ୁଥିଲା। ଏହା ଖାଦ୍ୟନଳୀ ଓ ପେଟର ସଂଯୋଗସ୍ଥଳରୁ ଆରମ୍ଭ କରି ଛୋଟ ଆନ୍ତ୍ର ଆଡ଼କୁ ଯାଉଥିବା ରାସ୍ତା ପର୍ଯ୍ୟନ୍ତ ପହଞ୍ଚିଯାଇଥିଲା। ଅସ୍ତ୍ରୋପଚାର ସମୟରେ ଏହି କଥାର ବିଶେଷ ଧ୍ୟାନ ରଖାଯାଇଥିଲା ଯେ କେଶଗୁଚ୍ଛ ବାହାର କରିବା ସମୟରେ ପେଟର ଭିତର ଆବରଣକୁ ଯେପରି କୌଣସି କ୍ଷତି ନହୁଏ।
ନିରନ୍ତର ନିଜ କେଶ ଖାଇବାର ଏହି ଅଭ୍ୟାସକୁ ଡାକ୍ତରୀ ଭାଷାରେ ଟ୍ରାଇକୋଫେଜିଆ କୁହାଯାଏ। ଦୀର୍ଘ ସମୟ ଧରି ଏପରି ହେବା ଦ୍ୱାରା ପେଟରେ କେଶର ଗୁଚ୍ଛ ସୃଷ୍ଟି ହୋଇଥାଏ, ଯାହାକୁ ଟ୍ରାଇକୋବେଜୋଆର କୁହାଯାଏ।
ଆହୁରି ପଢ଼ନ୍ତୁ: ପବିତ୍ର ଗୁରୁ ଦିବସରେ ଛାତ୍ରଛାତ୍ରୀଙ୍କୁ ପାଠ ପଢ଼ାଇଲେ ଗଞ୍ଜାମ ଜିଲ୍ଲାପାଳ: ଛାତ୍ରଛାତ୍ରୀଙ୍କ ସଫଳତା ହିଁ ଗୁରୁମାନଙ୍କ ପାଇଁ ସର୍ବଶ୍ରେଷ୍ଠ ସମ୍ମାନ
ଅଧିକ ଦେଖନ୍ତୁ:
