39 minutes ago
3
ARTICLE AD BOX
ସବ୍ୟସାଚୀ ଦାଶ
ଓଡ଼ିଶା ବହଦିନ ଧରି ଭାରତର ଅର୍ଥନୈତିକ ବିକାଶ କାହାଣୀରେ ଏକ ବିପରୀତାଭାସର ସମ୍ମୁଖୀନ ହୋଇଆସିଛି। ରାଜ୍ୟରେ ଲୁହାପଥର, କୋଇଲା, ବକ୍ସାଇଟ୍ ଓ ଅନ୍ୟାନ୍ୟ ଖଣିଜ ସମ୍ପଦର ପ୍ରଚୁର ଭଣ୍ଡାର ରହିଛି। ଏହି ସମ୍ପଦ ଦେଶର ଶିଳ୍ପ ଅର୍ଥନୀତିକୁ ଶକ୍ତି ଯୋଗାଉଛି। କିନ୍ତୁ ଏହି କଞ୍ଚାମାଲରୁ ଉନ୍ନତମାନର ସାମଗ୍ରୀ, ବିଶେଷ ରାସାୟନିକ ଦ୍ରବ୍ୟ, ପ୍ରଯୁକ୍ତିଭିତ୍ତିକ ଉତ୍ପାଦ ଓ ଉପଭୋକ୍ତା ସାମଗ୍ରୀ ପ୍ରସ୍ତୁତ କରିବା ଭଳି ଅଧିକ ମୂଲ୍ୟ ସୃଷ୍ଟିକାରୀ କାର୍ଯ୍ୟର ବଡ଼ ଅଂଶ ପ୍ରାୟତଃ ଅନ୍ୟ ରାଜ୍ୟରେ ହୋଇଥାଏ। ଫଳରେ ଓଡ଼ିଶାରୁ ଉତ୍ତୋଳିତ ସମ୍ପଦ ଓ ରାଜ୍ୟ ଭିତରେ ସୃଷ୍ଟି ହେଉଥିବା ବ୍ୟାପକ ଅର୍ଥନୈତିକ ସୁଯୋଗ ମଧ୍ୟରେ ଏକ ବ୍ୟବଧାନ ରହିଯାଉଛି। ୨୦୩୬ ମସିହାରେ ରାଜ୍ୟ ଗଠନର ଶତବାର୍ଷିକୀ ସୁଦ୍ଧା ଏକ ସମୃଦ୍ଧ ଓ ବିବିଧମୁଖୀ ଅର୍ଥନୀତି ଗଠନ କରିବାକୁ ହେଲେ ଏହି ବ୍ୟବଧାନ ଦୂର କରିବା ଅତ୍ୟନ୍ତ ଜରୁରୀ।
Cyclone Arnab: ଆରମ୍ଭ ହେଲା ବାତ୍ୟା ‘ଅର୍ଣ୍ଣବ’ର ସ୍ଥଳଭାଗ ଛୁଇଁବା ପ୍ରକ୍ରିୟା, ଜାରି ରହିବ ବର୍ଷା
ନିକଟରେ ମୁମ୍ବାଇରେ ଆୟୋଜିତ ‘ଇଣ୍ଡିଆ କେମ୍ ୨୦୨୬’ କାର୍ଯ୍ୟକ୍ରମରେ ଓଡ଼ିଶାର ଅଂଶଗ୍ରହଣ ରାଜ୍ୟର ଶିଳ୍ପ ବିକାଶ ଦିଗକୁ ପୁନର୍ବିଚାର କରିବାର ଏକ ସୁଯୋଗ ଆଣିଛି। ଓଡ଼ିଶା ୯ଟି ବୁଝାମଣାପତ୍ର ଏବଂ ୪ଟି ନିବେଶ ଆଗ୍ରହ ପ୍ରସ୍ତାବ ମାଧ୍ୟମରେ ମୋଟ ୫୩,୮୯୩.୫୧ କୋଟି ଟଙ୍କାର ନିବେଶ ପ୍ରସ୍ତାବ ହାସଲ କରିଛି। ତେବେ ଏହି ନିବେଶ ପ୍ରସ୍ତାବକୁ ପ୍ରକୃତ ପୁଞ୍ଜି ନିବେଶ କିମ୍ବା ସୃଷ୍ଟି ହୋଇସାରିଥିବା ନିଯୁକ୍ତି ସହ ସମାନ ବୋଲି ଧରିନେବା ଠିକ୍ ହେବ ନାହିଁ। ତଥାପି ଏହି ପ୍ରସ୍ତାବଗୁଡ଼ିକ ଓଡ଼ିଶାର ଶିଳ୍ପ ବିକାଶ ପାଇଁ ଏକ ଉତ୍ସାହଜନକ ସଙ୍କେତ। ଏହାର ଗୁରୁତ୍ୱପୂର୍ଣ୍ଣ ଦିଗ ହେଉଛି ଓଡ଼ିଶାକୁ ଏକ ଖଣିଜ ଓ ଧାତୁକେନ୍ଦ୍ରିକ ଅର୍ଥନୀତିରୁ ରାସାୟନିକ ଶିଳ୍ପ, ପେଟ୍ରୋରସାୟନ, ପ୍ଲାଷ୍ଟିକ୍, ଯନ୍ତ୍ରପାତି ନିର୍ମାଣ ଏବଂ ଅନ୍ୟାନ୍ୟ ଉତ୍ପାଦନ କ୍ଷେତ୍ରକୁ ନେଇ ଏକ ସମନ୍ୱିତ ଶିଳ୍ପ ବ୍ୟବସ୍ଥା ଗଠନ କରିବାର ଲକ୍ଷ୍ୟ।
ଗୁଜରାଟ, ମହାରାଷ୍ଟ୍ର ଓ ତାମିଲନାଡ଼ୁର ବିକାଶ ଚିତ୍ରକୁ ଦେଖିଲେ ଓଡ଼ିଶା ପାଇଁ ଏହି ଲକ୍ଷ୍ୟ ପୂରଣରେ ପାରାଦୀପର ଭୂମିକା ଗୁରୁତ୍ୱପୂର୍ଣ୍ଣ। ବାର୍ଷିକ ୧୫ ନିୟୁତ ଟନ୍ କ୍ଷମତାବିଶିଷ୍ଟ ତୈଳ ବିଶୋଧନାଗାର, ପେଟ୍ରୋଲିୟମ୍, ରାସାୟନିକ ଓ ପେଟ୍ରୋରସାୟନ ନିବେଶ ଅଞ୍ଚଳ ଏବଂ ପ୍ଲାଷ୍ଟିକ୍ ପାର୍କ ଭଳି ଭିତ୍ତିଭୂମି ସେଠାରେ ରହିଛି। ଏହାଦ୍ବାରା ରାଜ୍ୟରେ ପଲିମର୍, ପ୍ୟାକେଜିଂ ସାମଗ୍ରୀ, ବୈଷୟିକ ବସ୍ତ୍ର ଭଳି ଦ୍ରବ୍ୟ ଉତ୍ପାଦନ ପାଇଁ ସୁଯୋଗ ରହିଛି। ଧାମରା ଓ ଗୋପାଳପୁର ବନ୍ଦରକୁ ଆଧାର କରି ଅନ୍ୟାନ୍ୟ ଶିଳ୍ପର ବିକାଶ ହୋଇପାରିବ। ସେହିପରି ଅନୁଗୋଳ ଓ ଢେଙ୍କାନାଳରେ ଧାତୁ, କୋଇଲା, ଶକ୍ତି ଓ ବିଦ୍ୟମାନ ଶିଳ୍ପର ଚାହିଦାକୁ ଆଧାର କରି ଉତ୍ପାଦନ କ୍ଷେତ୍ରକୁ ବିସ୍ତାର କରାଯାଇପାରିବ।
Cyclone: ବଙ୍ଗୋପସାଗରରେ ବାରମ୍ବାର କାହିଁକି ସୃଷ୍ଟି ହୁଏ ଶକ୍ତିଶାଳୀ ବାତ୍ୟା
‘ସମୃଦ୍ଧ ଓଡ଼ିଶା ୨୦୩୬’ର ଲକ୍ଷ୍ୟ କେବଳ ଅର୍ଥନୀତିର ଆକାର ବୃଦ୍ଧି ନୁହେଁ। ଏହାର ଅର୍ଥ ହେଉଛି ଉନ୍ନତ ଜୀବନଜୀବିକା, ଉତ୍ପାଦନଶୀଳ ନିଯୁକ୍ତି, ଉନ୍ନତ ସହର ଓ ଶିଳ୍ପ କେନ୍ଦ୍ର, ଗ୍ରାମୀଣ ଆୟର ସ୍ଥିରତା ଏବଂ ରାଜ୍ୟର ଯୁବପିଢ଼ି ପାଇଁ ଅଧିକ ସୁଯୋଗ। ଅର୍ଥନୈତିକ ବିକାଶର ଏକ ନୂଆ ପର୍ଯ୍ୟାୟକୁ ପ୍ରବେଶ କରିବା ପାଇଁ ଓଡ଼ିଶା ପାଖରେ ପ୍ରାକୃତିକ ସମ୍ପଦ, ଶିଳ୍ପ ଭିତ୍ତିଭୂମି ଓ ନିବେଶ ଆଗ୍ରହ ରହିଛି। ତେବେ ଏହି ସୁଯୋଗକୁ ସଫଳତାରେ ପରିଣତ କରିବା ପାଇଁ ଆହୁରି ଅନେକ କାମ କରିବାକୁ ପଡ଼ିବ। ବିଶେଷ କରି ସମ୍ପଦକୁ ଆଧାର କରି ରାଜ୍ୟ ଭିତରେ ଯେତେ ଅଧିକ ମୂଲ୍ୟ, ଦକ୍ଷତା, ଉଦ୍ୟୋଗ ଓ ସମୃଦ୍ଧି ସୃଷ୍ଟି କରାଯାଇ ପାରିବ ତାହା ହିଁ ଓଡ଼ିଶାର ଭବିଷ୍ୟତ ନିର୍ଦ୍ଧାରଣ କରିବ।
