15 hours ago
3
ARTICLE AD BOX
ମଣ୍ଡି: ନେପାଳରେ ଗତ ୨୬ ଅଗଷ୍ଟରେ ଆସିଥିବା ଭୟଙ୍କର ଆକସ୍ମିକ ବନ୍ୟାରେ ମୃତ୍ୟୁମୁଖରୁ ବର୍ତ୍ତି ହିମାଚଳପ୍ରଦେଶର ମଣ୍ଡି ଜିଲ୍ଲାର ୫୦ ବର୍ଷୀୟ ଜ୍ଞାନ ସିଂହ ଘରକୁ ଫେରିଛନ୍ତି। ସୁନ୍ଦରନଗର ଉପବିଭାଗର ମାଲୋହ ଗ୍ରାମର ଜ୍ଞାନ ସିଂହ ନେପାଳର ଏକ ଜଳବିଦ୍ୟୁତ୍ ପ୍ରକଳ୍ପରେ ଫୋର୍ମ୍ୟାନ୍ ଭାବେ କାମ କରୁଥିଲେ। ବନ୍ୟା ସମୟରେ ପ୍ରାୟ ଦୁଇ ଦିନ ଓ ଗୋଟିଏ ରାତି ପାହାଡ଼ ଉପରେ ଫସି ରହିବା ପରେ ନେପାଳ ସେନାର ହେଲିକପ୍ଟର ତାଙ୍କୁ ଉଦ୍ଧାର କରିଥିଲା।
ଜ୍ଞାନ ସିଂହ କହିଛନ୍ତି, ଘଟଣା ଦିନ ସେ ପ୍ରକଳ୍ପର ପାୱାର୍ହାଉସ୍ରେ କାର୍ଯ୍ୟରତ ଥିଲେ। ହଠାତ୍ ପ୍ରବଳ ବନ୍ୟାଜଳ ମାଡ଼ି ଆସିବାରୁ ସେ ଓ ଅନ୍ୟ କର୍ମଚାରୀମାନେ ଜୀବନ ବଞ୍ଚାଇବା ପାଇଁ ପାହାଡ଼ ଆଡ଼କୁ ଦୌଡ଼ିଥିଲେ। କିଛି ସମୟ ମଧ୍ୟରେ ଚାରିଆଡ଼େ ପାଣି ଓ ଧ୍ୱଂସର ଦୃଶ୍ୟ ଦେଖାଯାଇଥିଲା। ପ୍ରାୟ ୧୦୦ ଜଣ ଲୋକ ତାଙ୍କ ସହ ସେହି ଅଞ୍ଚଳରେ ଫସି ରହିଥିଲେ। ସେମାନଙ୍କ ମଧ୍ୟରୁ ଜଣଙ୍କୁ ଛାଡ଼ି ଅନ୍ୟ ସମସ୍ତଙ୍କୁ ପରେ ସୁରକ୍ଷିତ ଭାବେ ଉଦ୍ଧାର କରାଯାଇଥିବା ଜ୍ଞାନ ସିଂହ କହିଛନ୍ତି।
ଗତ ଆଠ ମାସ ଧରି ଜ୍ଞାନ ସିଂହ ନେପାଳର ଉକ୍ତ ଜଳବିଦ୍ୟୁତ୍ ପ୍ରକଳ୍ପରେ କାମ କରୁଥିଲେ। ତେବେ ସମଗ୍ର ପ୍ରକଳ୍ପ ସହ ଜଡ଼ିତ ପ୍ରାୟ ୯୮ ଜଣ ଲୋକ ଏବେ ବି ନିଖୋଜ ଥିବା ସେ କହିଛନ୍ତି। ଜ୍ଞାନ ସିଂହଙ୍କ ସହ ହିମାଚଳପ୍ରଦେଶର ଆଉ ଚାରି ଜଣ କର୍ମଚାରୀ ସେଠାରେ କାମ କରୁଥିଲେ। ସେମାନଙ୍କ ମଧ୍ୟରୁ ତିନି ଜଣ ସୁରକ୍ଷିତ ଭାବେ ଫେରିଥିବାବେଳେ ଉନା ଜିଲ୍ଲାର ଜଣେ କର୍ମଚାରୀ ଏବେ ବି ନିଖୋଜ ଅଛନ୍ତି। ଜ୍ଞାନ ସିଂହଙ୍କ ପତ୍ନୀ କଲାବତୀ କହିଛନ୍ତି, ବିପର୍ଯ୍ୟୟ ପରେ ସ୍ୱାମୀଙ୍କ ସହ ଯୋଗାଯୋଗ ନ ହେବାରୁ ପରିବାର ଆଶା ଛାଡ଼ି ଦେଇଥିଲା। ପରଦିନ ଜ୍ଞାନ ସିଂହ ଫୋନ୍ କରିବା ପରେ ହିଁ ପରିବାର ତାଙ୍କ ଜୀବିତ ଥିବା ଜାଣିବାକୁ ପାଇଥିଲା।
