52 minutes ago
1
ARTICLE AD BOX
ଭୁବନେଶ୍ୱର: ସକାଳୁ ଉଠିବା ମାତ୍ରେ ମୋବାଇଲ୍ ଦେଖିବା, ଅଫିସ୍ରେ ଘଣ୍ଟା ଘଣ୍ଟା ଧରି ଲାପଟପ୍ରେ କାମ କରିବା ଏବଂ ରାତିରେ ଶୋଇବା ପୂର୍ବରୁ ସାମାଜିକ ଗଣମାଧ୍ୟମରେ ସମୟ ବିତାଇବା ଏବେ ଅନେକଙ୍କ ଦୈନନ୍ଦିନ ଅଭ୍ୟାସ ପାଲଟିଛି। ଏହି ଅଭ୍ୟାସ ଯୋଗୁଁ ଆଖି ଓ ନିଦ ଉପରେ ପ୍ରଭାବ ପଡ଼ୁଥିବା କଥା ଆମେ ଜାଣିଛେ। କିନ୍ତୁ ଅଧିକ ସମୟ ସ୍କ୍ରିନ୍ ବ୍ୟବହାର କଲେ ଷ୍ଟ୍ରୋକ୍ ହେବାର ଆଶଙ୍କା ରହିଛି କି?
ସ୍ନାୟୁବିଜ୍ଞାନ ବିଭାଗ ନିର୍ଦ୍ଦେଶକଙ୍କ ମତରେ, ଦୀର୍ଘ ସମୟ ଧରି ସ୍କ୍ରିନ୍ ସାମ୍ନାରେ ରହିବା ଷ୍ଟ୍ରୋକ୍ର ସିଧାସଳଖ କାରଣ ବୋଲି ପ୍ରମାଣ ମିଳିନାହିଁ। କିନ୍ତୁ ଏହା ଯୋଗୁଁ ଶାରୀରିକ ନିଷ୍କ୍ରିୟତା ବଢ଼ିଲେ ଧୀରେ ଧୀରେ ଷ୍ଟ୍ରୋକ୍ର ବିପଦ ବଢ଼ୁଛି।
ଷ୍ଟ୍ରୋକ୍ କାହିଁକି ହୁଏ?
ମସ୍ତିଷ୍କର କୌଣସି ଅଂଶକୁ ରକ୍ତ ଯୋଗାଣ ବନ୍ଦ ହୋଇଗଲେ କିମ୍ବା ମସ୍ତିଷ୍କରେ ରକ୍ତସ୍ରାବ ହେଲେ ଷ୍ଟ୍ରୋକ୍ ହୋଇଥାଏ। ରକ୍ତ ଯୋଗାଣ ବାଧାପ୍ରାପ୍ତ ହେବା ଫଳରେ ମସ୍ତିଷ୍କର କୋଷଗୁଡ଼ିକୁ ଆବଶ୍ୟକ ଅମ୍ଳଜାନ ମିଳିପାରେ ନାହିଁ। ଏହା ଫଳରେ ମସ୍ତିଷ୍କର କୋଷ କ୍ଷତିଗ୍ରସ୍ତ ହେବାକୁ ଲାଗନ୍ତି।
ମୋବାଇଲ୍ କିମ୍ବା ଲାପଟପ୍ ବ୍ୟବହାର କରିବା ଅପେକ୍ଷା ଏହା ସାମ୍ନାରେ ଦୀର୍ଘ ସମୟ ଧରି ବସି ରହିବା ଅଧିକ ଚିନ୍ତାର ବିଷୟ। ଲଗାତାର ବସି ରହିବା ଏବଂ ଶାରୀରିକ କାର୍ଯ୍ୟକଳାପର ଅଭାବ ଯୋଗୁଁ ଓଜନ ବୃଦ୍ଧି, ଉଚ୍ଚ ରକ୍ତଚାପ, ମଧୁମେହ ଓ ଖରାପ କୋଲେଷ୍ଟେରୋଲ୍ ଭଳି ସମସ୍ୟା ଦେଖାଦେଇଥାଏ। ଏହି ସମସ୍ୟାଗୁଡ଼ିକ ଷ୍ଟ୍ରୋକ୍ର ପ୍ରମୁଖ ବିପଦର କାରକ ହୋଇଥାଏ।
ଗବେଷଣା ଅନୁଯାୟୀ, ୬୦ ବର୍ଷ କିମ୍ବା ତା’ଠାରୁ କମ୍ ବୟସର ଯେଉଁ ବ୍ୟକ୍ତିମାନେ ଦିନକୁ ଅତି କମ୍ରେ ୮ ଘଣ୍ଟା ବସି ମନୋରଞ୍ଜନମୂଳକ କାର୍ଯ୍ୟରେ ସମୟ ବିତାଉଥିଲେ ଏବଂ ଶାରୀରିକ ଭାବେ କମ୍ ସକ୍ରିୟ ଥିଲେ, ସେମାନଙ୍କଠାରେ ଷ୍ଟ୍ରୋକ୍ର ବିପଦ ଅଧିକ ଥିଲା। ତେବେ ଏହି ଗବେଷଣା ସ୍କ୍ରିନ୍ ବ୍ୟବହାର ଓ ଷ୍ଟ୍ରୋକ୍ ମଧ୍ୟରେ ସିଧାସଳଖ କାରଣ-ପରିଣାମ ସମ୍ପର୍କ ପ୍ରମାଣ କରୁନାହିଁ। ବରଂ ନିଷ୍କ୍ରିୟ ଜୀବନଶୈଳୀର ବିପଦକୁ ଦର୍ଶାଉଛି।
ଷ୍ଟ୍ରୋକ୍ର ବିପଦ କମାଇବାକୁ କ’ଣ କରିବେ?
ସ୍କ୍ରିନ୍ ବ୍ୟବହାର ସମ୍ପୂର୍ଣ୍ଣ ବନ୍ଦ କରିବା ସମ୍ଭବ ନୁହେଁ। ତେଣୁ ଏହାର ବ୍ୟବହାର ସହ ଶାରୀରିକ କାର୍ଯ୍ୟକଳାପକୁ ମଧ୍ୟ ଗୁରୁତ୍ୱ ଦେବା ଆବଶ୍ୟକ।
• ଲଗାତାର ଅନେକ ଘଣ୍ଟା ବସି ନରହି ମଝିରେ ମଝିରେ ଉଠି ଚାଲନ୍ତୁ।
• ଫୋନ୍ରେ କଥା ହେବା ସମୟରେ ସମ୍ଭବ ହେଲେ ଚାଲିବା ଅଭ୍ୟାସ କରନ୍ତୁ।
• ପ୍ରତିଦିନ ବ୍ୟାୟାମ ଓ ଶାରୀରିକ କାର୍ଯ୍ୟକଳାପ ପାଇଁ ସମୟ ଦିଅନ୍ତୁ।
• ସନ୍ତୁଳିତ ଖାଦ୍ୟ ଖାଇବା ସହ ଓଜନ ନିୟନ୍ତ୍ରଣରେ ରଖନ୍ତୁ।
• ତମାଖୁ ସେବନରୁ ଦୂରେଇ ରୁହନ୍ତୁ ଏବଂ ମଦ୍ୟପାନ ସୀମିତ କରନ୍ତୁ।
• ପର୍ଯ୍ୟାପ୍ତ ନିଦ ନିଅନ୍ତୁ ଏବଂ ନିୟମିତ ରକ୍ତଚାପ ପରୀକ୍ଷା କରନ୍ତୁ।
ଷ୍ଟ୍ରୋକ୍ର ଲକ୍ଷଣକୁ ଅଣଦେଖା କରନ୍ତୁ ନାହିଁ। ହଠାତ୍ ମୁହଁର ଗୋଟିଏ ପାର୍ଶ୍ୱ ଢଳିଯିବା, ହାତ କିମ୍ବା ଗୋଡ଼ରେ ଦୁର୍ବଳତା ବା ଅସାରତା ଅନୁଭବ ହେବା, କଥା କହିବା କିମ୍ବା ବୁଝିବାରେ ଅସୁବିଧା, ହଠାତ୍ ଦୃଷ୍ଟିଶକ୍ତି ପ୍ରଭାବିତ ହେବା, ଶରୀରର ସନ୍ତୁଳନ ହରାଇବା ଏବଂ ଅସ୍ୱାଭାବିକ ଭାବେ ପ୍ରବଳ ମୁଣ୍ଡବିନ୍ଧା ହେବା ଷ୍ଟ୍ରୋକ୍ର ସଙ୍କେତ ହୋଇଥାଏ।
Dry scalp in winter: ଶୀତଦିନେ ଡ୍ରାଇ ସ୍କାଲ୍ପ ନା ରୂପି? କିପରି ଚିହ୍ନିବେ ଓ ଦୂର କରିବେ?
ଏଭଳି ଲକ୍ଷଣ ଦେଖାଦେଲେ ଅପେକ୍ଷା ନକରି ତୁରନ୍ତ ଜରୁରୀକାଳୀନ ଚିକିତ୍ସା ସହାୟତା ନିଅନ୍ତୁ। କିଛି ସମୟ ପରେ ଲକ୍ଷଣ ଆପେ ଆପେ ଠିକ୍ ହୋଇଗଲେ ମଧ୍ୟ ଡାକ୍ତରୀ ପରାମର୍ଶ ନେବା ଜରୁରୀ।
